Қазақстан Республикасы Yкiметiнiң 2002 жылғы 10 желтоқсандағы N 1300 қаулысына өзгерiс енгiзу туралы

Актінің түрі
Регламент
Қаулы
Қабылдау күні
07.04.2006
Өзгерту күні
07.04.2006
Актіні қабылдаған орган
Қазақстан Республикасының Үкіметі (Қазақстан Республикасының Премьер-Министрі)

       Қолданушылар назарына:  Қолданысқа енгізілу тәртібін 4-тармақтан қараңыз.

      2006 жылғы 23 қаңтардағы кеңесте Қазақстан Республикасының Президентi берген тапсырмаларды iске асыру мақсатында Қазақстан Республикасының Үкiметi  ҚАУЛЫ ЕТЕДI:

      1. "Қазақстан Республикасы Үкiметiнiң Регламентi туралы" Қазақстан Республикасы Үкiметiнiң 2002 жылғы 10 желтоқсандағы N 1300  қаулысына  (Қазақстан Республикасының ПҮКЖ-ы, 2002 ж., N 44, 443-құжат) мынадай өзгерiс енгiзiлсiн:
      көрсетiлген қаулымен бекiтiлген Қазақстан Республикасы Үкiметiнiң Регламентi осы қаулыға қосымшаға сәйкес редакцияда жазылсын.

      2. Қазақстан Республикасы Премьер-Министрiнiң Кеңсесi бұрын қабылданған нұсқаулықтарды осы қаулыға сәйкес келтiру жөнiнде шаралар қабылдасын.

      3. Орталық атқарушы органдар өз регламенттерiн осы қаулыға сәйкес келтiрсiн.

      4. Осы қаулы Қазақстан Республикасының Үкiметi Регламентiнiң 2006 жылғы 1 шiлдеден бастап қолданысқа енгiзiлетiн 28-тармағын, 30-тармағының екiншi бөлiгiн, 32, 53, 67-тармақтарын қоспағанда, қол қойылған күнiнен бастап қолданысқа енгізіледі.

       Қазақстан Республикасының
      Премьер-Министрі

Қазақстан Республикасы
Үкiметiнiң     
2006 жылғы 7 сәуiрдегi
N 256 қаулысына  
қосымша      

Қазақстан Республикасы  
Үкiметiнiң      
2002 жылғы 10 желтоқсандағы
N 1300 қаулысымен 
бекiтiлген   

  Қазақстан Республикасы Үкiметiнiң
РЕГЛАМЕНТI

  1. Жалпы ережелер

      1. Қазақстан Республикасының Үкiметi (бұдан әрi - Үкiмет) Қазақстан Республикасының атқарушы билiгiн жүзеге асырады, атқарушы органдардың жүйесiн басқарады және олардың қызметiне басшылық етедi.

      2. Үкiметтің қызметi Қазақстан Республикасының  Конституциясымен , "Қазақстан Республикасының Үкiметi туралы" Қазақстан Республикасының Конституциялық  заңымен , Қазақстан Республикасының өзге де нормативтiк құқықтық кесiмдерiмен және осы Регламентпен реттеледi.

      3. Қазақстан Республикасының Премьер-Министрi (бұдан әрi - Премьер-Министр) мен Үкiметтiң қызметiн ақпараттық-талдамалық, ұйымдық-құқықтық, құжаттамалық және өзге де қамтамасыз етудi Қазақстан Республикасы Премьер-Министрiнiң Кеңсесi (бұдан әрi - Кеңсе) жүзеге асырады.

      4. Құпия және құпия емес iс қағаздарын ұйымдастыруды және жүргiзудi, Премьер-Министрге, оның орынбасарына және Кеңсе Басшысына арналған хат-хабарларды, оның iшiнде әр түрлi байланыс және деректер беру арналары арқылы келiп түсетiн хабарларды қабылдауды, өңдеу мен таратуды Кеңсе Үкiмет белгiлеген тәртiппен жүзеге асырады.

      5. Соттарда Премьер-Министрдiң, оның орынбасарының немесе Кеңсе Басшысының тапсырмасы бойынша Yкiмет пен Премьер-Министрдiң мүдделерiн бiлдiрудi және қорғауды, сондай-ақ Премьер-Министрдiң тапсырмасы бойынша конституциялық iс жүргiзуге қатысуды талқылау мәнi болған мәселелер құзыретiне енетiн мемлекеттiк орган жүзеге асырады. Әдiлет министрлiгi тиiстi мемлекеттiк органға құқықтық және консультациялық көмек көрсетедi.

      6. Үкiметтiң нормативтiк құқықтық кесiмдерiне ресми түсiнiктеме берудi Үкiметтiң немесе Премьер-Министрдiң тапсырмасы бойынша Әдiлет министрлiгі жүзеге асырады.

      7. Үкiметтің құзыретiне енетiн кадр мәселелерiн шешу Қазақстан Республикасының заңнамасына сәйкес жүзеге асырылады.

      8. Премьер-Министр, оның орынбасары және Кеңсе Басшысы өз құзыретiне енетiн мәселелер бойынша Қазақстан Республикасының барлық мемлекеттiк органдары мен ұйымдарының басшыларына олармен алдын ала келiспей-ақ орындалуға мiндеттi тапсырмалар бере алады.

  2. Кiрiс хат-хабарларын қарау

      9. Премьер-Министрге және оның орынбасарына (бұдан әрi - Үкiмет басшылығы) арналған хат-хабарды Кеңсе алдын ала қарайды.
      Орталық және жергiлiктi атқарушы немесе өзге де мемлекеттiк органдардың құзыретiне жататын және олар бойынша Үкiмет немесе Премьер-Министр шешiмдерiнiң қабылдануын талап етпейтiн мәселелер бойынша Үкiмет басшылығына арналған заңды және жеке тұлғалардың хаттары мен өтiнiштерiн Кеңсе кейiннен авторына хабарлай отырып, мәселенiң мән-жайы бойынша қарау үшiн тиiстi органға жiбередi.
      Сондай-ақ Кеңсе:
      мемлекеттiк органдардың, облыстар мен Астана және Алматы қалалары әкiмдерінің немесе жекелеген заңды тұлғалардың Үкiмет немесе Премьер-Министр шешiмдерiнiң қабылдануын талап ететiн, оның iшiнде республикалық бюджеттен және Үкiметтiң резервiнен қаражат бөлу туралы, бiрақ өтiнiштерде көтерiлетiн мәселелер құзыретiне енетiн орталық атқарушы органдарда пысықталмаған өтiнiштерiн авторларына қайтарады;
      аудандар мен облыстық маңызы бар қалалар әкiмдерiнiң, Астана және Алматы қалаларының аудандары әкiмдерiнiң, аудандық маңызы бар қалалар аудандары әкiмдерiнiң, кенттер, ауылдар (селолар), ауылдық (селолық) округтер әкiмдерiнiң олармен және тиiстi мемлекеттiк органдармен келiсiлмеген өтiнiштерiн тиiсiнше облыстар мен Астана және Алматы қалаларының әкiмдерiне жiбередi.
      Кеңсе Үкiмет басшылығына және Кеңсе Басшысына арналған, мемлекеттiк органның (ұйымның) бiрiншi басшысы немесе бiрiншi басшының мiндетiн атқару ресми түрде жүктелген тұлға не Үкiмет басшылығына және Кеңсе Басшысына арналған құжаттарға қол қоюға бiрiншi басшы ресми түрде өкiлеттiк берген тұлға (бұдан әрi - басшы) қол қойған құжаттарды қабылдайды. Өзге арналған және басқа лауазымды тұлғалар қол қойған құжаттар қабылданбайды.
      Кеңсе берiлуi белгiленген есептiлiкте көзделмеген ақпаратты; салықтарды төлеу мерзiмiн ұзарту туралы өтiнiштердi; әзiрлеушi органдардың олар дайындаған нормативтiк құқықтық кесiмдердiң жобаларын және өзге құжаттарды орталық атқарушы органдар жұмыс органдары болып табылатын мүдделi мемлекеттiк органдардың немесе ведомствоаралық комиссиялардың қарауы туралы тапсырма беру өтiнiшi бар арыздарын; жабық конверттердегі хат-хабарларды (құпия, кадр мәселелерi бойынша және басқа қаладан келгендердi қоспағанда), осы Регламенттiң және "Кейбiр нұсқаулықтарды бекiту туралы" Қазақстан Республикасы Үкiметiнiң 2001 жылғы 31 қаңтардағы N 168  қаулысымен бекiтiлген Қазақстан Республикасы Премьер-Министрiнiң Кеңсесiнде iс жүргiзу жөнiндегi нұсқаулықтың (бұдан әрi - Кеңседе iс жүргiзу жөнiндегi нұсқаулық) талаптарын бұза отырып дайындалған құжаттарды қабылдамайды.

       10. Орталық атқарушы органдар мен олардың ведомстволары өздерiне келiп түсетiн хаттарды, өтiнiштердi және өзге де құжаттарды қарайды әрi өздерiнiң ережелерiне және өзге де нормативтiк құқықтық кесiмдерге сәйкес олардың құзыретiне енетiн барлық мәселелер бойынша өз бетiнше шешiмдер қабылдайды.
      Орталық атқарушы органдар олардың бiрлескен құзыретiне енетiн мәселелердi шешу үшiн қажет болған кезде белгiленген тәртiппен олардың басшылары қол қойған бiрлескен бұйрықтар түрiнде шешiмдер қабылдайды.
      Орталық атқарушы органдар өз бетiнше шешуi тиiс мәселелер бойынша Үкiметтiң қаулылары мен Премьер-Министрдiң өкiмдерi қабылданбайды. Орталық атқарушы органдардың аумақтық органдары нормативтiк құқықтық кесiмдер шығаруға құқығы жоқ.

      11. Ведомстволар тиiстi мемлекеттiк органның басшысының келiсiмi (ведомствоның хатында бұрыштамасы) болған кезде ғана, сондай-ақ Үкiмет басшылығының немесе Кеңсе Басшысының олардың атына берген тiкелей тапсырмаларына жауап жiберген кезде өз бетiнше Үкiметтiң атына өтiнiш бiлдiре алады. Мемлекеттiк органдардың құрылымдық бөлiмшелерi Үкiметтiң атына өз бетiнше өтiнiш бiлдiруге құқығы жоқ.

      12. Тиiстi шешiм қабылдау үшiн Үкiмет басшылығының атына бастамашылық тәртiппен жiберiлетiн қызметтiк хат-хабарды мемлекеттiк органдар мынадай жағдайларда енгiзедi:
      1) егер мәселенi шешу Үкiметтiң тiкелей құзыретiне енсе, енгiзiп отырған мемлекеттiк орган оны өзiнiң өтiнiшiнде көрсетедi;
      2) орталық атқарушы органдардың арасында қағидатты сипаттағы және қаржылық қамтамасыз ету мәселелерi бойынша еңсерiлмес келiспеушiлiктер болған кезде;
      3) егер мәселенi шешу ведомствоаралық үйлестiрудi талап етсе.
      Мұндай жағдайларда хат-хабар шешiм қабылдау үшiн мәселенiң мазмұнына қарай және Премьер-Министр, оның орынбасары және Кеңсе Басшысы арасында мiндеттердi бөлуге сәйкес Премьер-Министрге немесе оның орынбасарына жiберiлуi тиiс.

  3. Үкiмет мәжiлiстерiн жоспарлау

      13. Үкiмет мәжiлiстерiнде қарауға арналған мәселелер заңнамада белгiленген Үкiмет өкiлеттiктерiн ескере отырып анықталады.

      14. Үкiмет мәжiлiстерiнде қарауға арналған мәселелердiң тоқсан сайынғы тiзбесiн кезектi тоқсан басталғанға дейiн Үкiмет мүшелерiнiң, агенттiктер төрағаларының ұсыныстары бойынша Кеңсе жасайды. Үкiмет мәжiлiстерiнде қарау жоспарланып отырған мәселелердiң тiзбесi Премьер-Министрдің өкiмiмен бекiтiледi.
      Жоспарланған мәселелердiң бекiтiлген тiзбесi Үкiмет мүшелерiне, агенттiктердiң төрағаларына, облыстар мен Астана және Алматы қалаларының әкiмдерiне және қажет болған кезде басқа да мемлекеттiк органдардың және өзге де ұйымдардың басшыларына жөнелтiледi.
      Жоспарланған мәселенi қараудан алу немесе оны қарауды басқа мерзiмге ауыстыру туралы шешiмдi мәселенi дайындауға жауапты мемлекеттiк органның немесе өзге де мүдделi органның (ұйымның) басшысы қол қойған, Премьер-Министрдiң атына жазылған жазбаша өтiнiш негiзiнде Премьер-Министр не онымен келiсiм бойынша Кеңсе Басшысы қабылдайды. Көрсетiлген шешiм туралы өзiнiң құзыретiне орай мүдделi мемлекеттiк органдар хабардар етiледi.

  4. Yкiмет мәжiлiстерiн дайындау және өткiзу тәртiбi

      15. Үкiмет мәжiлiстерi Үкiмет мәжiлiстерiнде қарауға арналған мәселелердiң тоқсан сайынғы тiзбесiне сәйкес немесе қажет болған кезде, бiрақ кемiнде айына бiр рет өткiзiледi және оны Премьер-Министр не Қазақстан Республикасының Президентi (бұдан әрi - Президент) шақырады.

      16. Үкiмет мәжiлiстерiне Премьер-Министр, ал ол болмаған кезде Премьер-Министр белгiлеген мiндеттердi бөлуге сәйкес Премьер-Министрдi алмастыратын не Премьер-Министр белгілеген тәртiппен Премьер-Министрдiң мiндетiн атқарушы Премьер-Министрдiң орынбасары төрағалық етедi.
      Мәжiлiстерге Президент қатысқан кезде Президент немесе оның тапсырмасы бойынша Премьер-Министр төрағалық етедi.
      Үкiмет мәжiлiстерi ашық болып табылады әрi мемлекеттiк және орыс тiлдерiнде жүргiзiледi. Президенттiң не Премьер-Министрдiң бастамасы бойынша Yкiметтiң жабық мәжiлiстерi өткiзiлуi мүмкiн.

      17. Мәжiлiс, егер оған Yкiмет мүшелерiнiң кемiнде үштен екiсi қатысса, заңды болып саналады. Yкiмет мүшелерi мәжiлiстерге алмастыру құқығынсыз қатысады.
      Мәселенiң Үкiмет мәжiлiсiнде қаралу нәтижелерi бойынша қатысушы Үкiмет мүшелерiнiң көпшiлiк дауысымен хаттамалық шешiм қабылданады, ал дауыстар тең болған кезде мәжiлiске төрағалық етушiнiң дауысы шешушi болып табылады.

      18. Үкiмет мәжiлiстерiне, әдетте, Премьер-Министрмен келiсiлген тiзбе бойынша агенттiктердiң төрағалары, Кеңсенiң құрылымдық бөлiмшелерiнiң басшылары қатысады.
      Үкiмет мәжiлiстерiне Мемлекет басшысының кесiмдерiмен осындай құқық берiлген лауазымды тұлғалар да қатыса алады.
      Үкiмет мәжiлiстерiне Кеңсенiң шақыруы бойынша Парламент Сенаты мен Мәжiлiсiнiң депутаттары, облыстардың, Астана және Алматы қалаларының әкiмдерi, басқа да мемлекеттiк органдар мен ұйымдардың басшылары, Кеңсе қызметкерлерi мен өзге де адамдар қатыса алады.
      Үкiмет мәжiлiстерiне шақырылғандардың тiзiмiн анықтау немесе нақтылау жөнiндегi ұсынысты мәселенi дайындауға жауапты мемлекеттiк орган талқыланатын мәселелерге қарай мәжiлiске дейiн кемiнде 5 күнтiзбелiк күннен кешiктірмей енгiзедi.
      Yкiмет мәжiлiсiне шақырылғандардың тiзiмiне Премьер-Министрмен келiсiм бойынша Кеңсе Басшысы қол қояды. Шақырылғандардың Үкiмет мәжiлiсiне қатысуын Кеңсе қамтамасыз етедi.

      19. Мемлекеттiк органдар Үкiмет мәжiлiсiнде қарауға арналған мәселенi дайындау кезiнде мынадай талаптарды сақтайды:
      1) мәжiлiске ұсынылатын құжаттар Үкiмет мәжiлiстерiнде қаралатын мәселелер бойынша хаттамалық шешiмдердiң жобаларына, анықтамаларға, салыстырма кестелерге, ақпараттық (талдамалық) және басқа да материалдарға мемлекеттiк органның басшысы әр парағына қол қояды және ол қол қойған iлеспе хатпен енгiзiледi;
      2) әрбiр мәселе бойынша хаттамалық шешiм жобасының, анықтаманың, өзге де қажеттi материалдардың тақырыбы бiрдей болуы және мәселенiң мәнiн толық көрсетуi тиiс. Әдетте, олардың көлемi 5 бет мәтiннен аспауы тиiс (мемлекеттiк және орыс тiлдерiндегi мәтiндер үшiн N 14 мөлшерлi "TimesNewRoman" қарпi қолданылады);
      3) Үкiмет мәжiлiсiнде бейнелi ақпарат көрсету туралы мәселе мәселенi дайындауға жауапты мемлекеттiк органның басшысымен, Кеңсе Басшысымен алдын ала келiсiлуi тиiс;
      4) Үкiмет мәжiлiсiне құпия материалдар Кеңсеге Үкiмет қаулысымен бекiтiлген Қазақстан Республикасында құпиялылық режимiн қамтамасыз ету жөнiндегi нұсқаулықтың талаптарына сәйкес енгізiледi.
      Үкiмет мәжiлiстерiне материалдар дайындаған кезде орталық атқарушы органдардың ведомстволары осы Регламенттiң 11-тармағының талаптарын сақтауы тиiс.

      20. Yкiмет мәжiлiсiнде қарауға дайындалған материалдар мемлекеттiк және орыс тiлдерiнде мәжiлiске дейiнгi 5 күнтiзбелiк күннен кешiктiрмей Кеңсеге енгiзiледi. Кеңсе Премьер-Министрмен не оны алмастыратын немесе Премьер-Министрдiң мiндетiн атқарушы тұлғамен келiсiм бойынша Кеңсе Басшысы бекiтетiн мәжiлiстiң күн тәртiбiнiң жобасын жасайды, күн тәртiбiн тиiстi материалдармен бiрге Үкiмет мүшелерiне және Кеңсе Басшысы қол қойған мәжiлiске шақырылғандардың тiзiмiне сәйкес басқа да лауазымды тұлғаларға дереу жолдайды.
      Мемлекеттiк органдар Үкiмет мәжiлiсiне материалдарды уақтылы ұсынбаған жағдайда Кеңсе Басшысы бұл туралы Премьер-Министрге немесе оны алмастырушы не Премьер-Министрдiң мiндетiн атқарушы тұлғаға баяндайды. Үкiмет мәжiлiстерiне материалдардың уақтылы ұсынылмағандығы үшiн жауапкершiлiк осы органдардың бiрiншi басшыларына жүктеледi.
      Премьер-Министрдiң не оны алмастырушы немесе Премьер-Министрдiң мiндетiн атқарушы тұлғаның тапсырмасы бойынша Үкiмет мәжiлiсi шұғыл түрде өткiзілетiн айрықша жағдайларда материалдар Кеңсеге ол өткiзiлетiн күнi енгiзiлуi мүмкiн және Үкiмет мәжiлiсiне қатысушыларға мәжiлiсте тiкелей жеткiзiледi.

      21. Мәжiлiске қатысып отырғандар өздерiнiң атына немесе өздерi бiлдiрiп отырған органдардың (ұйымдардың) атына тапсырмалар мен олардың орындалу мерзiмiнiң деректер жазбасын жүргiзуi тиiс.
      Үкiмет мәжiлiсiнiң хаттамасын дайындау мақсатында, әдетте, Кеңсенiң тиiстi бөлiмшесiнiң мәжiлiске қатысып отырған қызметкерi хаттамалық жазбалар жүргiзедi, оларда талқыланып отырған мәселелердiң атауы мен мәнi, баяндамашылар және талқылау кезiнде сөз сөйлеушiлер, олардың сөйлеген сөздерiнiң, ескертулердiң негiзгi мазмұны және Үкiмет мүшелерi қабылдаған шешiмдер тiркеледi.
      Әдетте, кейiннен фонограммалары толығымен жазылатын және оларды басып шығарылатын, Үкiмет мәжiлiстерiнiң дыбыстық жазбасы жүргізiледi. Қажет болған кезде Кеңсе Басшысының нұсқауы бойынша мәжiлiстiң бейне жазбасы жүргiзiлуi мүмкiн.
      Үкiмет мәжiлiсiнiң хаттамасын мәжiлiсте қаралған мәселелер құзыретiне жататын Кеңсенiң құрылымдық бөлiмшелерi дайындаған хаттамалық тапсырмалардың тұжырымдамалары негiзiнде Кеңсенiң құжаттамалық қамтамасыз етуге жауапты бөлiмшесi мәжiлiс аяқталған күнiнен бастап үш күн мерзiмде елтаңбалық бланкiге жасайды. Бұдан кейiн хаттамаға Кеңсенiң құрылымдық бөлiмшелерiнiң басшылары (өздерiнiң құзыретiне жататын мәселелер бойынша), мәжiлiске қатысқан Премьер-Министрдiң орынбасары, Кеңсе Басшысы немесе оның мiндетiн атқарушы тұлға бұрыштама соғады және мәжiлiске төрағалық етушi қол қояды.
      Президенттiң төрағалық етуiмен өткiзiлген Үкiмет мәжiлiстерi хаттамаларының жобаларын Кеңсе келiсу және Мемлекет басшысына қол қоюға ұсыну үшiн Президент Әкiмшiлiгiне енгiзедi.

      22. Президент төрағалық еткен мәжiлiстердi қоспағанда, Үкiмет мәжілістерiнiң әрбiр хаттамасына күнтiзбелiк жылдың басынан бастап кезегiмен реттiк нөмiр берiледi. Хаттамалар немесе олардың үзiндi көшiрмелерi оларға қол қойылған күнi Yкімет мүшелерiне, ал қажет болған кезде мәжiлiстерде тиiстi тапсырмалар берiлген басқа да мемлекеттiк органдар мен лауазымды тұлғаларға жөнелтiледi.
      Жоғарыда көрсетiлгендерден басқа, Үкiмет мәжiлiстерi хаттамаларының түпнұсқалары, оларға қоса берiлетiн құжаттар, фонограммалардың басып шығарылғандары, ауызекi ақпаратты магниттi жеткiзгiштер және бейне материалдар тұрақты сақтаудағы құжаттар тiзiмдемесiне енгiзiледi және Кеңсе мұрағатында сақталады.

  5. Орталық атқарушы органдардың Yкiмет қаулылары мен
Премьер-Министр өкiмдерiнiң жобаларын дайындау
кезiндегi өзара iс-қимыл жасау тәртiбi

      23. Орталық атқарушы органдардың Үкiмет қаулылары мен Премьер-Министр өкiмдерiнiң жобаларын дайындау кезiндегi өзара iс-қимылы, әдетте, аппарат басшылары немесе аппараттың Мемлекет басшысының кесiмдерi мен тапсырмаларының, Үкiмет кесiмдерiнiң, Қазақстан Республикасы Президентi Әкiмшiлiгінiң басшылығы, Yкiмет басшылығы мен Кеңсе Басшысы, өзiнiң бiрiншi басшысы және оның орынбасарлары тапсырмаларының уақтылы және сапалы орындалуы жөнiндегi жұмысын ұйымдастыруға, iс қағаздарын жүргiзуге және құжаттардың өтуiне, орындалуын бақылауға және атқарушылық тәртiпке жауап беретiн олардың мiндетiн атқарушы тұлғалар арқылы жүзеге асырылады.

      24. Орталық атқарушы органдар аппараттарының қызметiн ведомствоаралық үйлестiрудi Кеңсе Басшысы орталық атқарушы органдардың аппараттары басшыларымен (олардың мiндетiн атқарушы тұлғалармен) апта сайын кеңестер өткiзу жолымен жүзеге асырады, оларда заң жобаларын, Үкiмет қаулылары мен Премьер-Министр өкiмдерiнiң жобаларын дайындаудың проблемалық мәселелерi қаралады. Кеңеске шақырылғандардың тiзiмдерiн жасауды және оларды шақыруды Кеңсе Басшысының нұсқауына сәйкес оның қабылдау бөлмесi қамтамасыз етедi. Кеңес, әдетте, алдын ала күн тәртiбi жасалмай және материалдар енгiзiлмей өткiзiледi. Кеңестiң хаттамасы жасалады, оларды фонограммасының жазбасы жүргiзiледi. Кеңестiң нәтижелерi хаттамалар түрiнде ресiмделедi. Кеңес хаттамаларын дайындауды, Кеңсенiң мүдделi құрылымдық бөлiмшелерiнiң басшыларымен келiсудi, ресiмдеудi және қол қоюға ұсынуды Кеңсенiң тиiстi бөлiмшесi кеңес өткiзiлген күнiнен бастап екi күннен кешiктiрмей жүзеге асырады.

  5. Мемлекеттiк органдардың Yкiмет қаулылары
мен Премьер-Министр өкiмдерiнiң жобаларын
дайындау және ресiмдеу тәртiбi

      25. Мемлекеттiк органдар Үкiмет қаулыларының жобаларын (бұдан әрi - қаулылардың жобалары) дайындауды Қазақстан Республикасы Конституциясының, заңнамалық кесiмдердiң, Президент кесiмдерiнiң және өзге де нормативтiк құқықтық кесiмдердiң негiзiнде және оларды орындау үшiн жүзеге асырады. Қаулылардың жобаларын уәкiлеттi органдар өз бастамалары бойынша немесе егер заңнамада өзгеше белгiленбесе, жоғары тұрған мемлекеттiк органдардың тапсырмалары бойынша әзiрлейдi.
      Премьер-Министр өкiмдерiнiң жобаларын (бұдан әрi - өкiмдердiң жобалары) дайындау әкiмшiлiк-өкiмдiк, жедел және жеке сипаттағы мәселелердi шешу үшiн жүзеге асырылады.
      Орталық атқарушы органдар арасында қағидатты сипаттағы және қаржылық қамтамасыз ету жөнiндегi еңсерiлмес келiспеушiлiктер болған кезде келiсiлген шешiмдер қабылдауды, сондай-ақ ведомствоаралық үйлестiрудi талап ететiн мәселелер бойынша қаулылардың жобалары Премьер-Министрдiң нұсқауы бойынша Үкiмет мәжiлiстерiнде не Премьер-Министрде, оның орынбасарында немесе Кеңсе Басшысында өтетiн кеңестерде қаралуы мүмкiн. Үкiмет басшылығы мен Кеңсе Басшысында өтетiн кеңестердi дайындау және өткiзу тәртiбi Кеңседе iс жүргiзу жөнiндегi нұсқаулықта белгiленген.

      26. Қаулылар мен өкiмдердiң жобаларын дайындауды мемлекеттiк органдар "Қазақстан Республикасының Үкiметi туралы" Конституциялық заңның, Қазақстан Республикасының "Нормативтiк құқықтық актiлер туралы", " Қазақстан Республикасындағы тiл туралы " Заңдарының, Кеңседе iс жүргiзу жөнiндегi нұсқаулықтың, Қазақстан Республикасы Үкiметiнiң 1998 жылғы 22 шiлдедегi N 678  қаулысымен  бекiтiлген Қазақстан Республикасы Үкiметiнiң қаулылары мен Премьер-Министр өкiмдерiнiң жобаларын ресiмдеу жөнiндегi нұсқаулықтың (заңдық техникасы) және осы Регламенттiң талаптарын сақтай отырып, мемлекеттiк және орыс тiлдерiнде жүзеге асырады.
      Қаулының (өкiмнiң) жобасын әзiрлеудi жүзеге асыратын мемлекеттiк органның бiрiншi басшысы оның Қазақстанның 2030 жылға дейiнгi Даму  стратегиясына  және Үкiмет Бағдарламасына сәйкес келуi, жобаның уақтылы, сапалы әзiрленуi және белгiленген мерзiмде Үкiметке ұсынылуы, жобаның мемлекеттiк және орыс тiлдерiндегi (оның iшiнде магниттi жеткiзгiштерге енгізiлетiн) мәтiндерiнiң дәлме-дәл болуы, осы Регламент талаптарының сақталуы үшiн дербес жауап бередi.

      27. Экспорттық бақылауға жататын өнiмнiң экспорты, импорты және транзитi мәселелерi бойынша қаулылардың жобаларын дайындауды экспорттық бақылау жөнiндегi уәкiлеттi мемлекеттiк орган жүзеге асырады. Көрсетiлген қаулылардың жобаларын келiсу мен енгiзу Қазақстан Республикасының экспорттық бақылау мәселелерi жөнiндегi мемлекеттiк комиссиясының оң қорытындысы болған кезде жүзеге асырылады.
      "Байқоңыр" ғарыш айлағынан ғарыш аппараттарын ұшыру мен зымырандарды сынақтық ұшырудың жоспарлары жөнiндегi қаулылардың жобаларын келiсу мен енгiзу мәселелерi Yкiмет бекiткен тиiстi нұсқаулықпен айқындалады.
      Кадр мәселелерi бойынша қаулылардың жобаларын дайындауды Кеңсе жүзеге асырады.

      28. Жеке кәсiпкерлiк субъектiлерiнiң мүдделерiн қозғайтын қаулылар мен өкiмдердiң жобаларын әзiрлеу және қабылдау Қазақстан Республикасының "Нормативтiк құқықтық актiлер туралы" және " Жеке кәсiпкерлiк туралы " заңдарының талаптарына сәйкес жүзеге асырылады.

      29. Қаулының (өкiмнiң) жобасын әзiрлеушi, егер оны қабылдағаннан кейiн мұндай қажеттiлiк туындаса, жобада бiр мезгiлде Үкiметтiң және/немесе Премьер-Министрдiң бұрын қабылданған шешiмдерiн қаулының (өкiмнiң) жобасына сәйкес келтiру жөнiндегi нормаларды көздейдi.

      30. Әзiрлеушi қаулының (өкiмнiң) жобасына 1-қосымшаға сәйкес нысан бойынша түсiндiрме жазбаны мiндеттi түрде қоса бередi, онда мынадай негiзгi мәлiметтер қамтылуға тиiс:
      1) тиiстi нормативтiк құқықтық кесiмдерге жасалған сiлтеме бар жобаны қабылдауға негiз және/немесе оны қабылдау қажеттiлігінiң басқа да негiздемелерi;
      2) жоба бойынша қаржы шығындарының қажеттiлiгi және оның қаржылық қамтамасыз етiлуi, оның iшiнде қаржыландыру көзi және Республикалық бюджет комиссиясының шешiмi (егер ол қажет болса);
      3) жоба қабылданған жағдайдағы болжалды салдарлар;
      4) нақты мақсаттар мен күтiлетiн нәтижелердiң мерзiмi;
      5) жобада қаралатын мәселелер және оларды iске асыру нәтижелерi бойынша Президенттiң және/немесе Үкiметтiң бұрын қабылданған кесiмдерi туралы мәлiметтер;
      6) енгiзiлетiн жоба қабылданған жағдайда заңнаманы оған сәйкес келтiру қажеттiгi (басқа нормативтiк құқықтық кесiмдер қабылдау немесе қолданыстағы кесiмдерге өзгерiстер және/немесе толықтырулар енгiзу талап етiледi ме екендiгiн көрсету) не мұндай қажеттiлiктiң болмауы.
      Жеке кәсiпкерлiк субъектiлерiнiң мүдделерiн қозғайтын қаулының (өкiмнiң) жобасына түсiндiрме жазба мiндеттi түрде Үкiметтiң кесiмiн қолданысқа енгiзуге байланысты жеке кәсiпкерлiк субъектiлерi шығындарының азаюын және (немесе) артуын растайтын есептемелердiң нәтижелерiн қамтуға тиiс.
      Қаулылар (өкiмдер) жобаларының және оларға қосымшалардың әр парағына әзiрлеушi мемлекеттiк органның басшысы алдын ала қол қояды, iлеспе хаттарға басшы қол қояды.
      Қаулы жобасында халықаралық шарттарға немесе өзге де құжаттарға (заңнамалық кесiмдерден, Президент, Үкiмет және Премьер-Министр кесiмдерiнен басқа) сiлтемелер болған кезде әзiрлеушi осы құжаттардың тиiсiнше Сыртқы iстер министрлiгi немесе жобаны әзiрлеушi куәландырған мемлекеттiк, орыс және қол қойылған өзге тiлдердегi (әр түрлi оқылған кезде басымдығы бар) көшiрмелерiн мiндеттi түрде жобаға қоса бередi.

      31. Қаулылар мен өкiмдердiң жобалары олардың заңнамада белгiленген құзыретiне орай мүдделi мемлекеттiк органдармен мiндеттi түрде келiсiледi, бұл ретте жобаны келiсудегi мұндай мүдделiлiк жобада қаралатын мәселелердiң мәнi негiзге алына отырып, сондай-ақ жобада мемлекеттiк органдардың немесе олардың басшыларының атына тапсырмалар болған кезде белгiленедi.
      Кадрлық және ұйымдастырушылық сипаттағыны қоспағанда, қаулылардың жобалары Конституцияға, заңнамалық кесiмдерге, Президенттiң, Үкiмет пен Премьер-Министр кесiмдерiне сәйкестiк мәнiне заңдық сараптама жүргiзуге жауапты Әдiлет министрлiгiмен келiсiлуге тиiс:
      Оларды қабылдау экологиялық, оның iшiнде радиациялық қауiпсiздiкке, қоршаған ортаны қорғауға қатер төндiруi мүмкiн салдар болжанып отырған қаулылардың жобалары уәкiлеттi орган заңнамада белгiленген тәртiппен жүргiзетiн мiндеттi экологиялық сараптама жасауға жатады. Жобаны әзiрлеушi оны уәкiлеттi органның мемлекеттiк экологиялық сараптаманың нәтижелерi бойынша оң қорытындысы болған кезде Үкiметтiң басшылығының қарауына енгiзедi.

      32. Жеке кәсiпкерлiк субъектiлерiнiң мүдделерiн қозғайтын қаулылардың (өкiмдердiң) жобалары сараптамалық қорытынды алу үшiн жеке кәсiпкерлiк субъектiлерiнiң тiркелген бiрлестiктерiне жiберiледi.
      Жеке кәсiпкерлiк субъектiлерiнiң тiркелген бiрлестiктерiнiң сараптамалық қорытындылары ұсынымдық сипатта болады және қаулының (өкімнiң) жобасы қабылданғанға дейiн оған мiндеттi қосымша болып табылады.
      Жобаны әзiрлеушi сараптамалық қорытындымен келiспеген жағдайда жобаға iлеспе хатта сараптамалық қорытындымен келiспеу себептерiне дәлелдi негiздеме келтiруге тиiс.

      33. Заңнамаға сәйкес Әдiлет министрлiгiнде құқықтық сараптама жасауға жататын халықаралық ұйымдарға кiру және олардан шығу, Қазақстан Республикасының халықаралық шарттарын жасасу, орындау және күшiн жою мәселелерi жөнiндегi қаулылардың жобалары мүдделi мемлекеттiк органдармен алдын ала келiсiлуге тиiс, ал құқықтық сараптамадан өткендерi Сыртқы iстер министрлiгiнде келiсуге жатады. Көрсетiлген жобаларға мыналар қоса берiледi:
      1) тиiстi шет мемлекетпен (мемлекеттермен) немесе халықаралық ұйыммен келiсiлген әзiрлеушi органның басшысы алдын ала қол қойған халықаралық шарттың жобасы не Сыртқы iстер министрлiгi куәландырған оған сәйкес Қазақстан Республикасының халықаралық ұйымға кiруi немесе одан шығуы не Қазақстан Республикасының шартқа қосылуы жоспарланып отырған көп жақты халықаралық шарттың мемлекеттiк, орыс және қол қойылған өзге тiлдердегi (әр түрлi оқылған кезде басымдығы бар) мәтiнi;
      2) Сыртқы iстер министрлiгi куәландырған халықаралық шарттардың көшiрмелерi және оларға жобада сiлтемелер бар жобаны әзiрлеушi куәландырған халықаралық сипаттағы өзге де құжаттар.
      Қол қойылған халықаралық шарттардың және халықаралық сипаттағы өзге де құжаттардың мемлекеттiк және орыс тiлдерiндегi мәтiндерiнiң дәлме-дәлдiгін тиiсiнше Сыртқы iстер министрлiгi және әзiрлеушi орган оларды Кеңсеге енгiзгенге дейiн қамтамасыз етедi.

      34. Премьер-Министр не оның тапсырмасы бойынша Кеңсе Басшысы Үкiметтiң резервiнен қаражат бөлу және басқа да жедел мәселелердi шешу жөнiнде қаулылардың (өкiмдердiң) жобаларын келiсудiң өзге де рәсiмiн айқындай алады.

      35. Жобаны әзiрлеушi мемлекеттiк орган бiр мезгiлде осы Регламенттiң 31-тармағына сәйкес тиiстi мемлекеттiк органдарға қаулы (өкiм) жобасының, оған түсiндiрме жазбаның және басқа да қажеттi құжаттардың көшiрмелерiн келiсуге жiбередi.
      Қаулы (өкiм) жобасының көшiрмесiн келiсуге алған кезде мемлекеттiк органдар оған басқа да мемлекеттiк органдардың алдын ала бұрыштама соғуын талап етпеуi және желеу әрi өзге де негiзсiз себептер бойынша жобаны келiсуден бас тартпауы тиiс.

      36. Қаулылардың (өкiмдердiң) жобаларын мемлекеттiк органдарда қарау және келiсу олар түскен күнiнен бастап мынадай мерзiмнен аспауы тиiс:
      1) осы Регламенттiң 69 және 70-тармақтарында көзделген жағдайларды қоспағанда, қаулылардың жобалары, оның iшiнде Президенттiң және Қазақстан Республикасы Парламентiнiң қарауына енгiзу туралы тиiсiнше Президент кесiмдерiнiң жобалары мен заң жобалары - 10 жұмыс күнi;
      2) Премьер-Министр өкiмдерiнiң жобалары - 5 жұмыс күнi;
      3) табиғи және техногендiк сипаттағы төтенше жағдайларды жою, сондай-ақ iзгiлiк көмек мәселелерi бойынша қаулылар мен өкiмдердiң жобалары - 3 жұмыс күнi.
      Премьер-Министрдiң, оның орынбасарының немесе Кеңсе Басшысының тапсырмалары бойынша Үкiметтiң қаулыларын немесе Премьер-Министрдiң өкiмдерiн жедел қабылдау қажет болған кезде нақты жобаларды мемлекеттiк органдарда келiсудiң неғұрлым қысқа мерзiмi белгiленуi мүмкiн. Мұндай жағдайда қаулының (өкiмнiң) жобасына мемлекеттiк органдардың бiрiншi басшылары Үкiмет мәжiлiсiнде, Үкiмет басшылығында немесе Премьер-Министрдiң нұсқауы бойынша Кеңсе Басшысында болған кеңесте бұрыштама соғуы мүмкiн.

      37. Қаулының (өкiмнiң) жобасын келiсушi мемлекеттiк органда қарау және келiсу (түпнұсқаға бұрыштама соғу) осы Регламентте белгiленген мерзiмде және осы мемлекеттiк органның құзыретi шеңберiнде жүзеге асырылуға тиiс.
      Қаулының (өкiмнiң) жобасын қарау қорытындылары бойынша келiсушi мемлекеттiк орган әзiрлеушiге жауаптың мынадай нұсқаларының бiрiн ұсынуға тиiс:
      1) жоба ескертулерсiз келiсiлуi мүмкiн. Бұл жағдайда әзiрлеушi оған келiсушi орган басшысының бұрыштамасын қою үшiн жобаның түпнұсқасын ұсынады;
      2) жоба бар ескертулер жойылған кезде келiсiлуi мүмкiн. Бұл ретте ескерту келiсушi органның басшысы қол қойған хатта баяндалады, мұнда оларды жою жөнiндегi ұсыныстар мiндеттi түрде қамтылуға тиiс. Бұл жағдайда әзiрлеушi ескертулермен келiскен кезде жобаларды пысықтау жұмыс тәртiбiмен жүзеге асырылады, бұдан кейiн жобаның түпнұсқасы келiсушi органның бiрiншi басшысының бұрыштамасын қоюға ұсынылады;
      3) жобаны келiсуден бас тартылды. Бұл ретте келiсушi органның басшысы қол қойған келiсуден бас тартуға уәждеме бар хат қоса берiледi.
      Келiсушi мемлекеттiк органдарға қаулылардың (өкiмдердiң) жобаларын "ескертулермен" келiсуге (бұрыштама қоюға) тыйым салынады.

      38. Егер әзiрлеушi келiсушi органның ескертулерiмен келiспеген жағдайда, ол өзара қолайлы шешiм дайындау үшiн келiсушi органдардың тиiстi өкiлдерiнiң (министрлердiң орынбасарлары, вице-министрлер, департаменттердiң басшылары) қатысуымен кеңес шақыруға құқылы. Егер көрсетiлген кеңес қорытындылары бойынша өзара қолайлы келiсiмге қол жеткiзiлмесе, осы Регламенттiң 25-тармағында көзделген жағдайларды қоспағанда, жоба Үкiметке енгiзiлмейдi. Бұл ретте жоба Премьер-Министрдiң не оны алмастыратын немесе Премьер-Министрдiң мiндетiн атқарушы тұлғаның не Кеңсе Басшысының тапсырмасы бойынша әзiрленген жағдайда әзiрлеушi тапсырма авторына қалыптасып отырған жағдай туралы хабарлайды, ал жоба бастамашылық тәртiппен әзiрленген жағдайда жоба қараудан алып тасталады.

      39. Үкiметтiң қаулысы оның ұжымдық заңды пiкiрiн бiлдiруi тиiстiлiгiне байланысты қаулылардың жобалары, сондай-ақ заңдардың, Мемлекет басшысы кесiмдерiнiң және Парламент депутаттары бастамашылық жасаған заң жобаларына Үкiмет қорытындыларының жобалары бойынша Үкiмет мүшелерiнiң дауыс беруi жүргiзiледi.
      Дауыс берудi жүргiзу мақсатында қаулы жобасының (заң, Мемлекет басшысының кесiмi, Үкiметтiң қорытындысы жобасының) түпкiлiктi нұсқасын Кеңсеге енгiзер алдында әзiрлеушi оның ақпаратты қағаз және/немесе магниттi жеткiзгiштердегi мәтiнiнiң көшiрмелерiн не электронды көшiрмесiн электронды почта арқылы (құпия сипаттағы және кадр мәселелерi жөнiндегi жобалардан басқа) Үкiмет мүшелерiнiң барлығына (Премьер-Министрдi, оның орынбасарын және әзiрлеушi жобаны келiсудi жүргiзген Үкiмет мүшелерiн қоспағанда) жiбередi. Жобаға қосымшалар Yкiмет мүшелерiне, тек оларға қатысты бөлiгiнде жiберiлуi мүмкiн.
      Үкiмет мүшелерiнiң көрсетiлген жобалар бойынша дауыс беру мерзiмi жобалардың көшiрмелерi (электронды көшiрмелерi бар хабарламалар) жiберiлген күнiнен бастап 3 жұмыс күнiнен аспауға тиiс. Дауыс беру мерзiмi аяқталғанға дейiн Үкiмет мүшелерi әзiрлеушiге жобалар бойынша өз пiкiрiн бiлдiретiн жазбаша жауаптар жiбередi. Көрсетiлген мерзiмде жазбаша жауап берiлмеген жағдайда, Үкiмет мүшесi жобаны қабылдауға дауыс бердi деп саналады. Қаулылардың жобалары бойынша дауыс берудi Үкiмет мүшелерi алмастыру құқығынсыз жүзеге асырады. Егер жоба бойынша Үкiмет мүшелерiнiң кемiнде үштен екiсi дауыс берiп, олардың көпшiлiгi жобаны қабылдауға пiкiр бiлдiрсе дауыс беру өткiзiлдi деп саналады. Олай болмаған жағдайда дауыс беру өткiзiлмедi деп саналады және Кеңсе енгiзілген жобаны қабылдамайды.
      Қаулының жобасы бойынша дауыс беру нәтижелерiн әзiрлеушi жобамен және 2-қосымшаға сәйкес нысан бойынша оған басқа да материалдармен бiрге бiр мезгiлде ұсынады.
      Қажет болған жағдайда Премьер-Министрмен келiсiм бойынша қаулылардың (заңдардың, Мемлекет басшысы кесiмдерiнiң, Үкiмет қорытындыларының) жобаларын Кеңсе Басшысы Үкiмет мүшелерiне дауыс беруге жiбере алады.

      40. Ол бойынша Үкiмет мүшелерiнiң дауыс беруi өткiзiлген қаулылардың және өкiмдердiң А4 форматындағы жай қағаз парақтардағы (мемлекеттiк және орыс тiлдерiндегi мәтiндер үшiн N 14 мөлшерлi "TimesNewRoman" қарпi қолданылады, символдарды кодтау стандарты ҚР СТ 1048-2002 стандартына сәйкес) және ақпаратты магниттi жеткiзгiштегi (бұдан әрi - магниттi жеткiзгіш) мәтiндiк файлдар түрiндегi түпнұсқаларын, сондай-ақ оған қажеттi материалдарды әзiрлеушi мемлекеттiк органдардың өкiлдерi өз қолымен Кеңсеге енгiзедi. Бұл ретте қаулылардың (өкiмдердiң) жобаларына iлеспе хаттарда тапсырманың нөмiрi мен берiлген күнi көрсетiле отырып, олардың не Үкiмет басшылығының тапсырмасы бойынша немесе Президент, Үкiмет немесе Премьер-Министр кесiмiнiң нақты тармағын орындау үшiн не бастамашылық тәртiппен енгiзiлгендiгi көрсетiлуге тиiс. Почта арқылы келiп түскен жобаларды (құпия сипаттағы жобаларды қоспағанда) Кеңсе әзiрлеушiге қарамай және тiркемей қайтарады.
      Кеңседе тiркелер алдында жобалар осы Регламенттiң және Кеңседе iс жүргiзу жөнiндегi нұсқаулықтың талаптарына сәйкестiгiне, сондай-ақ дәлме-дәлдігіне (кездейсоқ таңдау бойынша жекелеген парақтары) тексеріледі. Жоба мәтіндері көрсетiлген талаптарға сәйкес келмеген немесе олардың мемлекеттiк және орыс тiлдерiнде дәлме-дәл еместiгi анықталған жағдайда жоба тiркелместен (құпия сипаттағы жобаларды қоспағанда) анықталған кемшiлiктердi жою үшiн әзiрлеушiнiң өкiлiне қайтарылады.
      Кеңсеге келіп түсетін "аса маңызды", "өте құпия" және "құпия" деген құпиялылық белгілерi бар қаулылардың (өкiмдердiң) жобалары, сондай-ақ олардан жасалатын құпия үзiндi көшiрмелерi бар құпия емес жобалар тәртiппен тiркеледi және Қазақстан Республикасында құпиялылық режимiн қамтамасыз ету жөнiндегі нұсқаулықтың талаптарына сәйкес Кеңсе Басшысына баяндалады. Көрсетiлген талаптарға сәйкес келмеген жағдайда бұл жобалар Кеңсе Басшысының тапсырмасы бойынша әзiрлеушiге қайтарылады.

      41. Кеңсеге мемлекеттiк органның бiрiншi басшысының мiндетiн атқарушы тұлға немесе Үкiметтiң және Кеңсенiң басшылығына арналған құжаттарға қол қоюға бiрiншi басшы ресми түрде өкiлеттiк берген тұлға бұрыштама соққан қаулының (өкiмнiң) жобасы не олар қол қойған iлеспе және өзге де хаттар енгізiлген кезде жобаға оған бiрiншi басшының мiндетiн атқару жүктелгенi туралы не оған Үкiметтiң және Кеңсенiң басшылығына арналған құжаттарға қол қоюға бiрiншi басшы өкiлеттiк бергендiгi туралы бұйрықтың көшiрмесi қоса берiледi.

      42. Қаулының (өкiмнiң) жобасы тiркелгеннен кейiн Кеңседе, егер Үкiметтiң басшылығы немесе Кеңсе Басшысы өзгеше белгiлемесе, мынадай:
      қаулылардың, оның iшiнде тиiсiнше Президент кесiмдерiнiң жобалары мен заң жобаларын Президенттiң және Қазақстан Республикасы Парламентiнiң қарауына енгiзу туралы жобалары - 10 жұмыс күнiнен аспайтын;
      Премьер-Министр өкiмдерiнiң жобалары - 5 жұмыс күнiнен аспайтын;
      табиғи және техногендiк сипаттағы төтенше жағдайларды жою, сондай-ақ iзгiлiк көмек мәселелерi жөнiндегi қаулылар мен өкiмдердiң жобалары - 3 жұмыс күнiнен аспайтын мерзiмде оның қаржы-экономикалық, құқықтық және өзге де аспектiлерiне сараптама (бұдан әрi - сараптама) жүргiзiледi.
      Сараптама қаулы (өкiм) жобасының дайындалу сапасын: қаралатын мәселелер мен оларды шешу жөнiнде ұсынылатын шаралардың толық ашылуын, уақтылығын және негiздiлiгiн, Үкiмет пен Премьер-Министрдiң құзыретiне сәйкестiгiн бағалау, ықтимал терiс салдарды, заңдық техника ережелерiне сәйкестiгiн айқындау үшiн, сондай-ақ жобаның жоғары деңгейдегi, Үкiмет пен Премьер-Министрдiң нормативтiк құқықтық кесiмдерiне сәйкестігі және жобаның мемлекеттiк және орыс тiлдерiндегi мәтiндерiнiң дәлме-дәлдiгi мәнiне жүргiзiледi. Жобалар сараптамасының нәтижелерi Премьер-Министр мен оның орынбасары, Кеңсе Басшысы үшiн олар тиiстi жобаларға қол қою немесе олармен келiсу туралы не оларды пысықтауға немесе қосымша келiсуге қайтару туралы шешiмдер қабылдаған кезде ақпараттық-ұсынымдық сипатқа ие болады.
      Кеңсенiң тиiстi жобаның өтуiне жауапты құрылымдық бөлiмшесi жүргiзiлген сараптаманың нәтижелерi бойынша осы Регламентке 3-қосымшаға сәйкес нысан бойынша Премьер-Министрдiң атына Кеңсе Басшысының қолы қойылған жобаға қорытынды дайындайды. Қорытынды мынадай ақпаратты қамтуға тиiс: жобаны кiм және қандай негiзде енгiзiп отыр, жобаны қабылдау қажеттiлiгі неге негiзделдi, оны дайындау кезiнде осы Регламенттiң талаптары мен енгiзу мерзiмi (егер жобаны әзiрлеу нормативтiк құқықтық кесiмде немесе тапсырмада көзделсе) сақталды ма, Үкiмет мүшелерiнiң жоба бойынша дауыс беру қорытындылары, жобаны Кеңсенiң құрылымдық бөлiмшелерiнде сараптау нәтижелерi, оның iшiнде мазмұндық және құқықтық сипаттағы, заңдық техника бойынша бар ескертулер, жобаны пысықтау туралы мәлiметтер (осындай факт болған кезде), жоба бойынша өзге де қажеттi мәлiметтер, жобаны қабылдау немесе қабылдамау мүмкiндiгi не оны пысықтауға немесе қосымша келiсуге жiберу туралы ұсынымдар.

      43. Үкiметтiң басшылығы және Кеңсе Басшысы сараптама жүргiзу барысында немесе оның нәтижелерi бойынша жобаны мемлекеттiк органға мынадай негiздер бойынша пысықтауға қайтаруға құқылы:
      1) оның жоғары деңгейдегi нормативтiк құқықтық кесiмдерге сәйкес келмеуi анықталғанда;
      2) жобаның мемлекеттiк және орыс тiлдерiндегi мәтiндерiнiң дәлме-дәл еместiгi анықталғанда;
      3) Үкiмет бекiткен Кеңседе iс жүргiзу жөнiндегi нұсқаулықтың, Қазақстан Республикасы Үкiметi қаулыларының және Премьер-Министрi өкiмдерiнiң жобаларын ресiмдеу жөнiндегі нұсқаулықтың (заңдық техникасы) және осы Регламенттiң талаптарының бұзылғаны анықталғанда.
      Кеңсенiң құрылымдық бөлiмшелерiнiң өзге де аспектiлер бойынша терiс сараптамалық қорытындысы да Yкiмет басшылығының немесе Кеңсе Басшысының жобаны қайтару туралы шешiм қабылдауы үшiн негiз бола алады.

      44. Жоба пысықтауға мынадай түрде қайтарылуы мүмкiн:
      1) мемлекеттiк органдар бiрiншi басшыларының не олар өкiлеттiк берген тұлғалардың қатысуымен өткен Үкiмет мәжiлiсiнiң немесе Үкiмет басшылығында немесе Кеңсе Басшысында өткен кеңестiң хаттамасы негiзiнде;
      2) Кеңсенiң құрылымдық бөлiмшелерiнiң жоба сараптамасының нәтижелерi бойынша қорытындысы негiзiнде Премьер-Министрдiң, оның орынбасарының немесе Кеңсе Басшысының жазбаша тапсырмасы бойынша;
      3) жобаны әзiрлеушi органның басшысы не оның өкiлi (ол өкiлеттiк берген тұлға) Кеңсенiң құрылымдық бөлiмшелерiнiң ескертулерiмен жазбаша келiскен кезде Кеңсе Басшысының рұқсатымен әзiрлеушiнiң өкiлi (өкiлеттi тұлғасы) жобаның келiсу парағына қол қойып жұмыс тәртiбiмен. Әзiрлеушiнiң жобаны жұмыс тәртiбiмен пысықтау мерзiмi 7 жұмыс күнiнен аспауға тиiс.
      Жобаларды пысықтау мақсатында әзiрлеушi мемлекеттiк органның мүдделi органдар өкiлдерiнiң (министрлер орынбасарларының, вице-министрлердiң, департаменттер басшыларының) қатысуымен жедел кеңестер шақыруға құқығы бар.
      Егер қайтарылатын жобаларға тапсырмаларда өзгеше мерзiм көрсетiлмесе, жобаларды пысықтауды, қайтадан дауыс беру өткiзудi және енгiзудi әзiрлеушiлер қайтарылған күнiнен бастап бiр айдан аспайтын мерзiмде (жұмыс тәртiбiмен пысықталатын жағдайларды қоспағанда) жүзеге асырады. Пысықтау мерзiмi аяқталғаннан кейiн әзiрлеушi Кеңсеге пысықталған жоба мен ол бойынша дауыс беру нәтижелерiн (белгiленген нысан бойынша) не жобаны қараудан алу туралы жазбаша өтiнiштi ұсынуы тиiс.
      Жоба пысықталғаннан кейiн Кеңсеге қайта енгiзiлген кезде оған сараптама жүргiзудiң және қорытынды дайындаудың осы Регламенттiң 42-тармағында көзделген және пысықталған жоба Кеңседе тiркелген күннен бастап есептелетiн жаңа мерзiмi белгiленедi.
      Қажет болған кезде Үкiметтiң басшылығы және Кеңсе Басшысы әзiрлеушi органдардың жобаларды пысықтау және оларды Кеңседе сараптау мерзiмiн қысқартуы мүмкiн.

      45. Ведомстволардың санын, министрлiктердiң, агенттiктердiң және ведомстволардың штат санын, олардың басшы лауазымды тұлғаларын өзгертудi (ұлғайтуды немесе қысқартуды) көздейтiн қаулылардың жобалары бойынша Үкiмет мұндай өзгерiске Мемлекет басшысының немесе оның уәкiлеттiгi бойынша Президент Әкiмшiлiгiнiң жазбаша келiсiмiн алуға тиiс.

      46. Кеңседе сараптама жүргiзiлгеннен, жоба пысықталғаннан (осындай факт болған кезде) және қорытынды дайындалғаннан кейiн жоба Кеңседе iс жүргiзу жөнiндегi нұсқаулыққа сәйкес тиiстi қорғалған елтаңбалық бланкiге көшiрiледi, оған: орындаушы мен жобаның өтуiне жауапты құрылымдық бөлiмшенiң басшысы; жобаға сараптама жүргiзген құрылымдық бөлiмшелердiң басшылары; жоба мәтiндерiнiң дәлме-дәлдiгiн және олардың мемлекеттiк және орыс тiлдерiнiң ережелерiне сәйкестiгiн тексерудi жүзеге асырған қызметкерлер бұрыштама соғады.

      47. Қаулылардың (өкiмдердiң) жобаларын Премьер-Министрдiң орынбасарында келiсу Премьер-Министр, оның орынбасары мен Кеңсе Басшысы арасында мiндеттердi бөлуде айқындалған өкiлеттiкке сәйкес оның мүдделiлігі белгiленген жағдайда жүзеге асырылады. Премьер-Министрдiң орынбасарында қаулылардың жобалары бойынша ескертулер мен ұсыныстар болған кезде олар кеңестер өткiзуi мүмкiн. Кеңестерде қабылданған шешiмдер хаттамалар түрiнде ресiмделедi.
      Премьер-Министрдiң мүдделi орынбасары келiскеннен (бұрыштама соққаннан) кейiн қаулының (өкiмнiң) жобасына Кеңсенiң Басшысы бұрыштама соғады және оны жоба бойынша шешiм қабылдау үшiн Премьер-Министрге баяндайды. Премьер-Министр қаулының (өкiмнiң) жобаларын қосымша (құқықтық, экономикалық, экологиялық, қаржылық және басқа да) сараптама жүргiзу үшiн кез келген тиiстi ұйымға жiбере алады.
      Қаулы жобасы бойынша тұжырымдамалық сипаттағы немесе қаржылық қамтамасыз ету мәселелерi бойынша Yкiмет мүшелерiнiң келiспеушiлiктерi не Премьер-Министр Кеңсесiнiң терiс сараптамалық қорытындысы болған кезде не Премьер-Министрдiң нұсқауы бойынша Кеңсе Басшысы Үкiмет мүшелерiнiң көпшiлiгiмен келiсiлген шешiмдi тұжырымдау үшiн кеңес өткiзуi немесе жобаны Үкiмет отырысының қарауына енгiзуге бастама жасауы мүмкiн. Келiсiлген ұстанымға қол жеткiзiлмеген кезде Үкiметтiң қаулысы қабылданбайды, бұл кеңестiң (отырыстың) хаттамасында тiркелуге тиiс.

      48. Үкiметтiң қаулылары мен Премьер-Министрдiң өкiмдерiне Премьер-Министр қол қояды. Премьер-Министр болмаған кезде Үкiметтiң қаулылары мен Премьер-Министрдiң өкiмдерiне Премьер-Министр белгiлеген тәртіппен оны алмастыратын тұлға немесе Премьер-Министрдiң мiндетiн атқарушы тұлға қол қоя алады.
      Қаулының (өкiмнiң) түпнұсқасына оған қол қойылғаннан кейiн түзетулер енгiзуге тыйым салынады.

      49. Үкiметтiң қаулылары мен Премьер-Министрдiң өкiмдерiн тiркеудi және есепке алуды Кеңсе жүзеге асырады.
      Қол қойылған Үкiметтiң қаулылары мен Премьер-Министрдiң өкiмдерiне Кеңсенiң құжаттамалық қамтамасыз ету үшiн жауапты бөлiмшесi:
      1) құпия емес қаулылар үшін - күнтiзбелiк жылдың басынан бастап реттiк есепке алу нөмiрiнен, өкiмдер үшiн - дефис арқылы "ө" әрпін қойып, күнтiзбелiк жылдың басынан бастап реттiк есепке алу нөмiрiнен;
      2) "Қызмет бабында пайдалану үшiн" деген белгiсi бар таралуы шектеулi қаулылар мен өкiмдер үшiн - құпия емес қаулылар (өкiмдер) үшiн кезектi реттiк нөмiрден және "қпү" кiшi әрiптерiнен;
      3) аса маңызды, өте құпия және құпия қаулылар мен өкiмдер үшiн - құпия қаулының (өкiмнiң) кезектi есепке алу нөмiрiн сызықша арқылы берiлген құпиялық белгiсiне сәйкес "аса м" - "аса маңызды", "өқ" - "өте құпия", "қ" - "құпия" кiшi әрiптерiмен бiрге қойып, құпия емес қаулыларға (өкiмдерге) арналған кезектi реттiк нөмiрден;
      4) бекiтiлген бюджеттiк бағдарламалардың паспорттарына өзгерiстер және/немесе толықтырулар енгiзу көзделетiн қаулылар үшін - әлiпбилiк тәртiппен берiлетiн әрiптiк литерi (литерлерi) бар бастапқы қаулының реттiк нөмiрiнен тұратын тiркеу нөмiрлерiн бередi.
      Кеңсе Басшысының нұсқауы бойынша қаулыларға (өкiмдерге) жоғарыда көрсетiлген тәртiппен құпия емес қаулыларға (өкiмдерге) арналған кезектi реттiк нөмiрден кейiн дефис арқылы қойылатын сандық литерi бар тiркеу нөмiрлерi берiлуi мүмкiн.

      50. Үкiмет қаулылары және Премьер-Министр өкiмдерiнiң түпнұсқалары тұрақты сақталатын құжаттарға жатады және Кеңседе кемiнде 15 жыл сақталады, осы мерзiм өткеннен кейiн олар Қазақстан Республикасының Орталық мемлекеттiк мұрағатына мемлекеттiк сақтауға берiледi.

      51. Үкiмет қаулылары мен Премьер-Министр өкiмдерiнiң куәландырылған көшiрмелерiн уақтылы шығаруды және таратуды Кеңсе жүзеге асырады. Қажет болған кезде қаулылардың (өкiмдердiң) қосымша даналары Кеңсе Басшысының рұқсатымен берiледi. Құпия сипаттағы қаулылар мен өкiмдердiң куәландырылған көшiрмелерi немесе олардың үзiндi көшiрмелерi белгiленген тәртiппен адресаттардың шектеулi санына жiберiледi.
      Оларда техникалық қателер анықталған кезде Үкiметтiң құпия емес қаулылары мен Премьер-Министр өкiмдерiнiң бұрын жiберiлген даналарын ауыстыру Кеңсе Басшысының рұқсатымен жүргiзiледi. Бұл ретте бастапқы жiберiлген даналарды алғандарға "Бұрынғы жiберiлгеннiң орнына" ("Взамен ранее разосланного") мөртаңбасы басылып, қаулылардың (өкiмдердiң) түзетiлген нұсқалары жiберiледi. Адресаттар көрсетiлген мөртаңбасы бар түзетiлген нұсқаны алғаннан кейiн олар қаулылардың (өкiмдердiң) бұрын жiберiлген даналарын Кеңсеге дереу қайтаруға тиiс.
      Қаулыларды (өкiмдердi) қайтарып алу Премьер-Министрдiң нұсқауы бойынша немесе онымен келiсiм бойынша Кеңсе Басшысының тапсырмасымен жүзеге асырылады.
      Аса маңызды, өте құпия және құпия қаулылар (өкiмдер) Кеңсе Басшысының хатымен ресми түрде қайтарып алынады.

      52. Үкiметтiң нормативтiк қаулысы қабылданғаннан кейiн министрлiктер мен олардың ведомстволары, агенттiктер, сондай-ақ жергiлiктi атқарушы органдар бiр ай мерзiмде өздерiнiң кесiмдерiн Үкiмет қабылдаған қаулыға сәйкес келтiруге және қажет болған кезде оны iске асыру мақсатында тиiстi кесiмдер шығаруға мiндеттi.

      53. Мемлекеттiк органдар республиканың заңнамасына және құқықтың ескiрген нормаларын анықтау, оларды iске асырудың тиiмдiлiгiн бағалау және оларға өзгерiстер мен толықтырулар енгiзу немесе олардың күшi жойылды деп тану жөнiнде уақтылы шаралар қабылдау үшiн өздерi әзiрлеушi болып табылған, қабылданған қаулылардың (өкiмдердiң) тұрақты мониторингiн жүзеге асыруға мiндеттi.

      54. Нормативтiк құқықтық кесiмдердi қабылдаған орган таратылған, қайта ұйымдастырылған немесе қайта құрылған жағдайда, оның кесiмдерiнiң күшi жойылды деп тану, оларға өзгерiстер мен толықтырулар енгізу туралы мәселелердi оның құқықтық мирасқоры немесе жоғары тұрған орган шешедi.

  7. Yкiмет енгiзетiн Президент кесiмдерiнiң жобаларын дайындау

      55. Үкiмет енгiзетiн Президент кесiмдерiнiң жобаларын дайындауды қолданыстағы заңнамаға және осы Регламентке сәйкес тиiстi орган жүзеге асырады.
      Президент кесiмдерiнiң жобалары Кеңсеге осы Регламентте Үкiметтiң қаулылары үшiн көзделген тәртiппен енгiзiледi. Бұл ретте Президент кесiмдерi жобаларының түпнұсқаларына әзiрлеушi органның және Әдiлет министрлiгiнiң басшылары бұрыштама соғады, басқа келiсушi органдардың басшылары Президент Әкiмшiлiгi белгiлеген келiсу парағына қол қояды.
      Президент кесiмдерiнiң жобалары Yкiмет қаулыларымен не Премьер-Министрдiң (оның мiндетiн атқарушы тұлғаның) хаттарымен Президент Әкiмшiлiгiне енгiзiледi. Бұл ретте, әдетте, хаттармен Президент Әкiмшiлiгі бұрын пысықтау үшiн қайтарған жобалар қайта енгiзiледi.

      56. Үкiмет Президент Әкiмшiлiгiне енгiзетiн Президент кесiмдерiнiң мемлекеттiк және орыс тiлдерiнде дайындалған жобалары мыналарды қамтуға тиiс:
      1) Президент кесiмiнiң жобасын енгiзу туралы Үкiмет қаулысының белгiленген тәртiппен Үкiметтiң мөрiмен куәландырылған көшiрмесi немесе Премьер-Министрдiң (Премьер-Министрдiң мiндетiн атқарушы тұлғаның) Президентке арналған хатының түпнұсқасы;
      2) Премьер-Министр (Премьер-Министрдiң мiндетiн атқарушы тұлға), Кеңсе Басшысы, жобаны әзiрлеушi мемлекеттiк органның және Әділет министрлiгiнiң басшылары бұрыштама соққан Президент кесiмiнiң тиiстi бланкiдегі жобасы. Президент кесiмiнiң жобасы мен оған қосымшаның әр парағына жобаны әзiрлеушi мемлекеттiк органның басшысы бұрыштама соғуы тиiс. Премьер-Министр (Премьер-Министрдiң мiндетiн атқарушы тұлға) және Кеңсе Басшысы (оның мiндетiн атқарушы тұлға) Президент кесiмiнiң тиiстi бланкiдегi жобасына әзiрлеушi орган және Әдiлет министрлiгi бiрiншi басшыларының бұрыштамасы бар жай қағаз парақтарында ұсынылған, Үкiметке енгiзiлген Президент кесiмiнiң жобасын қоса тiркеуге рұқсат етiледi;
      3) Премьер-Министр (Премьер-Министрдiң мiндетiн атқарушы тұлға) қол қойған көлемi 3 парақтан, ал күрделi мәселелер бойынша 5 парақтан аспайтын түсiндiрме жазба, онда мәселенiң мәнiсi мен Президент кесiмiн қабылдау қажеттiлiгiнiң, оның iшiнде қаржы-экономикалық негiздемесi, осы мәселе бойынша бұрын қабылданған Президент кесiмдерiнiң тiзбесi және олардың орындалуы туралы ақпарат, осы жобаны қабылдаудан күтiлетiн салдардың болжамы жазылады;
      4) егер Президент кесiмiнiң енгiзiлетiн жобасымен Президенттiң қолданыстағы кесiмдерiне өзгерiстер және/немесе толықтырулар енгізу көзделетiн болса, әзiрлеушi мемлекеттiк орган басшысының әр парағына алдын ала қолы қойылған және қолы қойылған Президент кесiмiнiң бұрынғы және жаңа редакциясының салыстырма кестесi;
      5) Президент Әкiмшiлiгi белгiлеген нысан бойынша жасалған Президент кесiмi жобасының келiсу парағы;
      6) өзге де қажеттi материалдар.

      57. Премьер-Министр (Премьер-Министрдiң мiндетiн атқарушы тұлға) Үкiметке тапсырманы қамтитын Президент кесiмi күшiне енген күнiнен бастап 3 жұмыс күнiнен кешiктiрмейтiн мерзiмде осы тапсырмалардың орындалуы үшiн жауапкершiлiк жүктелетiн лауазымды тұлғалар мен мемлекеттiк органдарды айқындайды.

  8. Үкiметтiң заң шығару қызметi

      58. Үкiметтiң заң шығару қызметi Үкiметтiң заң жобалау жұмыстарының жоспарына (бұдан әрi - Жоспар) сәйкес жүзеге асырылады.

      59. Үкiметтiң заң жобалау жұмыстарының ағымдағы және перспективалы жоспарларын қалыптастыру Президенттiң тапсырмалары, Yкiметтiң Бағдарламасы, мемлекеттiк бағдарламалар мен Үкiмет бекiтетiн бағдарламалар, мемлекеттiк бағдарламаларды iске асыру жөнiндегi iс-шаралар жоспарлары, сондай-ақ Премьер-Министрдiң шешiмдерi ескерiле отырып жүзеге асырылады.
      Жоспар заң жобаларының, оның iшiнде заң жобаларын әзiрлеушi мемлекеттiк органдарды, нақты заң жобаларын Әдiлет министрлiгiне, Yкiметке және Қазақстан Республикасының Парламентiне (бұдан әрi - Парламент) енгiзу мерзiмдерi, сондай-ақ заң жобаларын әзiрлеу мен енгiзу үшiн жауапты лауазымды тұлғалар көрсетiле отырып, қолданыстағы заңнамалық кесiмдерге өзгерiстер және/немесе толықтырулар енгiзудi көздейтiн заң жобаларының тiзбесiн бiлдiредi.

      60. Алдағы жылға арналған Жоспардың жобасын Әдiлет министрлiгi мемлекеттiк органдар мен Қазақстан Республикасы Yкiметiнiң жанындағы Заң жобалау қызметi мәселелерi жөнiндегi ведомствоаралық комиссия (бұдан әрi - Ведомствоаралық комиссия) ұсыныстарының негiзiнде жасайды және жыл сайын 1 қарашаға дейiн Үкiмет қаулыларының жобаларын енгiзу үшiн белгiленген тәртiппен Yкiметке ұсынады. Бұл ретте Әдiлет министрлігі Жоспардың жобасына енгiзiлген әрбiр заң жобасын әзiрлеу қажеттiлiгiнiң негіздемесiн қамтитын анықтаманы қоса тiркейдi.
      Ведомствоаралық комиссияның оң қорытындысы Жоспарға қандай да бiр заң жобасын енгiзу үшiн мiндеттi шарт болып табылады.

      61. Жоспарды Президентпен келiсу "Қазақстан Республикасы Yкiметiнiң заң жобалары жұмыстарының жоспарларын Қазақстан Республикасының Президентiмен және Қазақстан Республикасы Парламентiнiң Мәжiлiсiне Yкiмет енгiзетiн заң жобаларын Қазақстан Республикасы Президентiнiң Әкiмшiлігімен келiсу ережелерiн бекiту туралы" Қазақстан Республикасы Президентiнiң 2002 жылғы 17 мамырдағы N 873  Жарлығына  сәйкес жүзеге асырылады.

      62. Жоспарда көзделген заң жобаларын ұсыну мерзiмiн ауыстыру туралы, сондай-ақ заң жобаларын ағымдағы жылдың Жоспарынан алып тастау немесе оған қосымша заң жобаларын енгiзу туралы мәселелер Yкiметтiң тиiстi қаулыларын қабылдау жолымен шешiледi. Мұндай қаулылардың жобалары әзiрлеушi мемлекеттiк органның өтiнiшi бойынша Ведомствоаралық комиссияның отырысында алдын ала қаралады. Ведомствоаралық комиссияның оң қорытындысы болған кезде әзiрлеушi тиiстi жобаны осы Регламентте белгiленген тәртiппен Кеңсеге енгiзедi, бұл ретте жобаға түсiндiрме жазбада мiндеттi түрде осы мәселе бойынша Ведомствоаралық комиссияның негiздемесi мен шешiмi көрсетiледi.
      Мемлекеттiк және өзге де бағдарламалар, тұжырымдамалар, Үкiметтiң iс-шаралары жобаларының нормалары (ережелерi) заң жобалауды қамтамасыз ету бөлiгінде Ведомствоаралық комиссиямен келiсiледi.
      Мемлекеттiк және өзге де бағдарламаларға қоғамдық қатынастарды заңнамалық реттеудiң жаңа тетiктерiн енгiзу перспективалы Жоспарға өзгерiстер мен толықтырулар енгiзумен бiрге жүргiзiлуге тиiс.
      Заң жобалау жұмыстарының қабылданған жоспарларына енгiзiлетiн өзгерiстер және (немесе) толықтырулар Мемлекет басшысымен не оның тапсырмасы бойынша Қазақстан Республикасы Президентiнiң Әкiмшiлiгiмен мiндеттi түрде келiсiлуге жатады.

      63. Перспективалы және ағымдағы жоспарлардың орындалуын жалпы бақылауды Әдiлет министрлiгi жүзеге асырады.
      Әдiлет министрлiгi ай сайын Үкiметтiң заң жобалау қызметiнiң барысын қорытады және есептiден кейiнгi айдың 1-күнiне ағымдағы Жоспардың орындалу барысы туралы есептi, оның iшiнде жоспарланған заң жобаларының мемлекеттiк органдар мен Парламентте өтуi туралы ақпаратты ұсынады.
      Жоспарланған заң жобаларын әзiрлеу мерзiмi бұзылған кезде Кеңсе Әдiлет министрлiгi ақпаратының негiзiнде Премьер-Министрге заң жобаларын әзiрлеу мерзiмiнiң бұзылуына кiнәлi лауазымды тұлғаларды жауапкершiлiкке тарту туралы ұсыныстар енгiзе алады.

      64. Халықаралық шарттарды ратификациялау мен олардың күшiн жою туралы және оларға қосылу туралы заң жобаларынан басқа, жоспардан тыс заң жобалары Ведомствоаралық комиссиямен алдын ала келiсiлуге жатады, оның оң қорытындысы заң жобаларын белгiленген тәртiппен Үкiметке енгiзу үшiн негiз болады.

      65. Заң жобаларын әзiрлеудiң және ұсынудың сапасы, уақтылығы үшiн Жоспарда көрсетiлген лауазымды тұлғалар дербес жауапкершiлiкте болады.

      66. Жоспардың негiзiнде заң жобаларын әзiрлеушi мемлекеттiк органдар белгiленген мерзiмде заң жобаларын Кеңсеге осы заң жобаларын Парламенттiң Мәжiлiсiне енгiзу туралы Үкiмет қаулыларының жобаларымен бiрге енгiзедi.
      Көрсетiлген жобаларды дайындау, ресiмдеу, келiсу, оларға дауыс беру және енгiзу, сондай-ақ олар бойынша келiспеушiлiктердi қарау тәртiбi "Нормативтiк құқықтық актiлер туралы" Қазақстан Республикасының  Заңында , Қазақстан Республикасының Парламентi Мәжiлiсiнiң Регламентiнде және осы Регламентте көзделген ерекшелiктермен бiрге Үкiмет қаулыларының жобаларын енгiзу үшiн белгiленген тәртiпке ұқсас.
      Халықаралық шарттарды ратификациялау мен олардың күшiн жою туралы және оларға қосылу туралы заң жобаларын әзiрлеу және енгiзу "Халықаралық шарттар туралы" Қазақстан Республикасының  Заңында белгіленген тәртiппен жүзеге асырылады.
      Парламенттiң қарауына Үкiмет енгiзетiн заң жобалары (халықаралық шарттарды ратификациялау мен олардың күшiн жою туралы және оларға қосылу туралы заң жобаларын қоспағанда) бойынша "Норма шығармашылығы қызметiн жетiлдiру жөнiндегi шаралар туралы" Қазақстан Республикасы Үкiметiнiң 2002 жылғы 30 мамырдағы N 598  қаулысымен  бекiтiлген Заң жобаларына ғылыми сараптама жүргiзу ережесiне сәйкес заң жобасымен реттелетiн құқықтық қатынастарға қарай тиiстi ғылыми (құқықтық, экономикалық, экологиялық, қаржы және басқа да) сараптама жүргiзу мiндеттi. Бұл ретте оларды қабылдау экологиялық, оның iшiнде радиациялық қауiпсiздiкке, қоршаған ортаны қорғауға қатер төндiруi мүмкiн салдарларды болжайтын заңнамалық кесiмдердiң жобаларына мiндеттi экологиялық сараптама жүргiзiлуге тиiс.
      Заң жобасын әзiрлеушi жобаға тиiстi ғылыми сараптама жүргiзудi қамтамасыз етедi, оның нәтижелерi бойынша қорытынды ұсынымдық сипатқа ие болады (барлық заңды және жеке тұлғалардың орындауы үшiн мiндеттi мемлекеттік экологиялық сараптаманың қорытындысын қоспағанда). Әзiрлеушi көрсетiлген қорытындыларды мiндеттi түрде заң жобасына басқа материалдармен бiрге мемлекеттiк және орыс тiлдерiнде Кеңсеге енгiзедi. Ғылыми сараптаманың терiс қорытындысы кезiнде (мемлекеттiк экологиялық сараптаманы, оның нәтижелерi бойынша заң жобасында мiндеттi түрде жойылуға тиiс ескертулердi қоспағанда) заң жобасын әзiрлеушi мемлекеттiк орган сараптамалық қорытындының ұсыныстарына сәйкес заң жобасын пысықтау, сондай-ақ қайтадан немесе қосымша сараптама жүргiзу туралы өз бетiмен шешiм қабылдайды. Заң жобасы бойынша сараптамалық қорытындыдағы ұсынымдар қабылданбаған жағдайда, әзiрлеушi заң жобасына iлеспе хатта қабылдамау себептерiнiң дәлелдi негiздемесiн келтiруге тиiс.

      67. Жеке кәсiпкерлiк субъектiлерiнiң мүдделерiн қозғайтын заңдардың жобалары ұсынымдық сипатта болатын сараптамалық қорытындылар алу үшiн жеке кәсiпкерлiк субъектiлерiнiң тiркелген бiрлестiктерiне жiберiледi және заң жобалары қабылданғанға дейiн оларға мiндеттi қосымшалар болып табылады.
      Жобаны әзiрлеушi сараптамалық қорытындымен келiспеген жағдайда заң жобасына түсiндiрме жазбада сараптамалық қорытындымен келiспеу себептерiне дәлелдi негiз келтiруге тиiс.

      68. Парламент Мәжiлiсiне Үкiмет енгiзетiн заң жобаларын Президент Әкiмшiлiгiмен келiсу "Қазақстан Республикасы Үкiметiнiң заң жобалау жұмыстарының жоспарларын Қазақстан Республикасының Президентiмен және Қазақстан Республикасы Парламентiнiң Мәжiлiсiне Үкiмет енгiзетiн заң жобаларын Қазақстан Республикасы Президентiнiң Әкiмшiлiгiмен келiсу ережелерiн бекiту туралы" Қазақстан Республикасы Президентiнiң 2002 жылғы 17 мамырдағы N 873 Жарлығына сәйкес жүзеге асырылады.
      Мыналар Президент Әкiмшiлiгiмен мiндеттi түрде алдын ала келiсiлуге тиiс:
      1) Парламентте қаралуы Президент атынан шұғыл немесе басымдықты деп жариялау жоспарланатын заң жобалары. Президенттiң заң жобаларын шұғыл немесе басымдықты деп, оның iшiнде Үкiметтiң бастамасы бойынша жариялауы Қазақстан Республикасы Президентiнiң 2003 жылғы 29 сәуiрдегi N 1074  Жарлығымен  бекiтiлген Заңдар жобаларын қараудың басымдығын белгiлеу, сондай-ақ заң жобасының қаралуын шұғыл деп жариялау ережесiне сәйкес жүзеге асырылады;
      2) Президенттiң тапсырмасы бойынша Үкiмет әзiрлеген және Парламент Мәжiлiсiне енгiзуге жататын заң жобалары;
      3) конституциялық заңдардың, кодекстердiң жобалары, сондай-ақ қолданыстағы конституциялық заңдар мен кодекстердi өзгертуге және толықтыруға бағытталған заң жобалары;
      4) жергiлiктi мемлекеттiк басқаруды және жергiлiктi өзiн-өзi басқаруды, елдiң саяси және сайлау жүйелерiн жетiлдiруге бағытталған заң жобалары;
      5) қорғаныс және ұлттық қауiпсiздiк саласындағы құқықтық қатынастарды регламенттейтiн заң жобалары.
      Президент Әкiмшiлiгiнiң онымен келiсiлетiн заң жобалары бойынша ескертулері толық ескерілмейтін жағдайда, Кеңсе бұл туралы Президент Әкiмшiлiгін хабардар етедi.

      69. Қазақстан Республикасы Президентiнiң арнайы жолдауымен басымдықты деп айқындалған заң жобаларын (бұдан әрi - басымдықты заң жобалары) әзiрлеушi мемлекеттiк органдар осы Регламентке сәйкес келiсiлген заң жобаларын Кеңсеге заң жобасы басымдықты деп айқындалған күнiнен бастап 20 күнтiзбелiк күннен кешiктiрмей енгiзуге тиiс. Бұл ретте басымдықты заң жобаларын мемлекеттiк органдардың келiсу мерзiмi олар түскен күнiнен бастап 5 күнтiзбелiк күннен аспауға тиiс.
      Қазақстан Республикасы Президентiнiң Әкiмшiлiгiмен келiсiлгеннен кейiн Үкiмет басымдықты заң жобаларын 10 күнтiзбелiк күн мерзiмнен кешiктiрмей Парламент Мәжiлiсiнiң қарауына енгiзедi.

      70. Шұғыл деп жариялау жоспарланған заң жобаларын әзiрлеушi мемлекеттiк органдар осы Регламентке сәйкес келiсiлген заң жобаларын Кеңсеге Қазақстан Республикасы Президентiнiң 2003 жылғы 29 сәуiрдегi N 1074 Жарлығымен бекiтiлген Заңдар жобаларын қараудың басымдығын белгiлеу, сондай-ақ заң жобасының қаралуын шұғыл деп жариялау ережесiнiң 1-тармағына сәйкес Үкiметке немесе тиiстi мемлекеттiк органға хабарлама келiп түскеннен кейiн 10 күнтiзбелiк күннен кешiктiрмей енгiзуге тиiс. Бұл ретте шұғыл деп жариялау жоспарланған заң жобаларын мемлекеттiк органдармен келiсу мерзiмi олар келiп түскен күнiнен бастап 3 күнтiзбелiк күннен аспауға тиiс.
      Қазақстан Республикасы Президентiнiң Әкiмшiлiгiмен келiсiлгеннен кейiн Үкiмет шұғыл деп жариялау жоспарланған заң жобасын 7 күнтiзбелiк күн мерзiмнен кешiктiрмей Парламент Мәжiлiсiнiң қарауына енгiзедi.

      71. Президент шұғыл деп жариялаған заң жобасы Президенттiң арнайы жолдауы Парламентте жария етiлгеннен немесе осы жолдау Парламентке арналғаннан кейiнгi келесi күннен кешiктiрмей Парламент Мәжiлiсiнiң қарауына енгiзiледi.

      72. Кеңседе өту мерзiмi 10 күнтiзбелiк күннен аспауға тиiс (жобаның тiркелген күнiнен бастап қол қойылған құжатты шығаруға тапсырғанға дейiн) басымдықты заң жобалары мен шұғыл деп жариялау жоспарланып отырған заң жобаларынан басқа, заң жобаларына сараптама жасау және Кеңседе олар бойынша қорытындылар дайындау Кеңседе тiркелген күнiнен бастап 10 жұмыс күннен аспайтын мерзiмде жүзеге асырылады. Осы Регламентте көзделген негiздемелер бойынша заң жобаларын Кеңсе заң жобасын әзiрлеушi мемлекеттiк органға пысықтауға, оның iшiнде қажет болған кезде қосымша ғылыми сараптама жүргiзу үшiн қайтаруы мүмкiн.

      73. Кеңсеге заң жобасы бойынша енгiзiлетiн материалдар мемлекеттiк және орыс тiлдерiнде дайындалған:
      1) заң жобасын, ал қажет болған кезде қолданыстағы заңнамалық кесiмдерге өзгерiстер және/немесе толықтырулар енгiзу туралы не негiзгi жобаның қабылдануына байланысты заңнамалық кесiмдердiң күшi жойылды деп тану туралы заң жобаларын да (оның iшiнде магниттi жеткiзгiштердегi) және заң жобасын әзiрлеушi мемлекеттiк органның басшысы әр парағына алдын ала қол қойған, Үкiмет қаулылары үшiн осы Регламенттiң 31-тармағында белгiленген тәртiппен келiсiлген (бұрыштама соғылған) осы заң жобасын (заң жобаларын) Парламент Мәжiлiсiне енгiзу туралы Үкiмет қаулысының жобасын;
      2) осы Регламенттiң 30-тармағының талаптарына сәйкес дайындалған Үкiмет қаулысының жобасына түсiндiрме жазбаны;
      3) заң жобасы мақсаттарының, мiндеттерi мен негiзгi ережелерiнiң жан-жақты сипаттамасымен бiрге жобаны қабылдау қажеттiгiнiң негiздемесi, жобаны қабылдаудың ықтимал салдарының болжамы бар, қажет болған кезде заң жобасын әзiрлеушi мемлекеттiк органның басшысы әр парағына алдын ала қол қойған қаржы-экономикалық есептер мен статистикалық деректер қоса берiлген заң жобасына (заң жобаларына) түсiндiрме жазбаның (жазбалардың) жобасын, оның iшiнде магниттi жеткiзгiштегiнi;
      4) заң жобасын (заң жобаларын) мүдделi мемлекеттiк органдармен келiсу парағын (парақтарын);
      5) заң жобасының (заң жобаларының) ғылыми сараптамасының нәтижелерi бойынша қорытындыны (қорытындыларды);
      6) заң жобасын (заң жобаларын) әзiрлеушi мемлекеттiк органның басшысы қол қойған iлеспе хатты, бұл ретте Үкiметтiң тиiстi заң жобасы туралы қаулысының әрбiр жобасы жеке iлеспе хатпен енгiзiледi;
      7) қолданыстағы заңнамалық кесiмдерге өзгерiстер және/немесе толықтырулар енгiзудi көздейтiн заң жобасына заң жобасын әзiрлеушi мемлекеттiк органның басшысы әр парағына алдын ала қол қойған және қол қойған, енгiзiлетiн өзгерiстер мен толықтырулардың тиiстi негiздемесi бар бұрынғы және жаңа редакциядағы баптардың салыстырма кестесi қоса тiркеледi;
      8) Қазақстан Республикасы жасасқан халықаралық шарттарды Парламентке ратификациялауға енгiзу туралы заң жобасына Сыртқы iстер министрлiгi куәландырған, мемлекеттiк, орыс және әр түрлi оқылған кезде басымдығы бар оларға қол қойылған өзге тiлдердегi ратификациялауға енгiзiлетiн құжаттардың көшiрмелерi қоса тiркеледi;
      9) белгiленген нысандағы анықтама парақты қамтуға тиiс.
      Мемлекеттiк органдардың олар бойынша тұжырымдамалық сипаттағы келiспеушiлiктерi бар немесе қаржылық қамтамасыз ету мәселелерi бойынша заң жобалары Үкiмет басшылығының бастамашылығы бойынша шақырылатын кеңестерде қаралуы мүмкiн, олардың нәтижелерi хаттамалармен ресiмделедi. Егер кеңестерде талқыланатын заң жобасы бойынша келiспеушiлiктердi реттеу мүмкiн болмаса, Премьер-Министр немесе оның орынбасары олар бойынша Үкiметтiң түпкiлiктi шешiмiн қабылдау үшiн тиiстi заң жобаларының Үкiметтiң мәжiлiсiне шығарылуына бастамашылық жасай алады.

      74. Заң жобаларын әзiрлеушi мемлекеттiк органдар оларды Үкiметке енгiзу кезiнде нақты заң жобасын басымдықты деп қарауды айқындау немесе оны қарауды шұғыл деп жариялау туралы бiр уақытта ұсыныс енгiзуге құқылы. Бұл ретте заң жобасына түсiндiрме жазба, оның iшiнде оны басымдықты деп айқындау немесе шұғыл деп жариялау қажеттiлiгiнiң негiздемесiн қамтуға тиiс.
      Үкiмет өзi әзiрлейтiн заң жобаларына қатысты Президентке нақты заң жобасын басымдықты деп қарауды айқындау немесе оны қарауды шұғыл деп жариялау туралы ұсыныс енгiзедi. Бұл ретте Үкiметтiң ұсынысына тиiстi заң жобасы және заң жобасын Парламенттiң басымдықты деп қарауды айқындауы немесе оны қарауды шұғыл деп жариялауы қажеттiлiгiнiң негiздемесiн қамтитын және заң жобасының нақты мақсаттарын ашатын түсiндiрме жазба мен ол шешетiн мiндеттер қоса берiлуге тиiс.

      75. Үкiметтiң бастамашылығы бойынша Парламент Мәжiлiсiнiң қарауына енгiзiлетiн заң жобаларының түпнұсқаларына мiндеттi түрде: заң жобасын әзiрлеушi мемлекеттiк органның және Әдiлет министрлiгiнiң басшылары, Кеңсе Басшысы және Премьер-Министр (оның мiндетiн атқарушы тұлға) бұрыштама соғуға тиiс. Үкiмет бланкiсiне шығарылған заң жобасына түсiндiрме жазбаға Кеңсе Басшысы бұрыштама соғады және Премьер-Министр (оның мiндетiн атқарушы тұлға) қол қояды. Заң жобаларының түпнұсқаларымен бiрге Парламент Мәжілісіне олардың магниттi жеткiзгiштердегi көшiрмелерi енгiзiледi.

      76. Үкiметтiң бастамашылығы бойынша Парламентке енгiзiлген заң жобалары Парламент Мәжiлiсiнiң қаулылары бойынша ғана Кеңсеге қайтарылуы мүмкiн.

      77. Парламент депутаттары бастамашылық жасаған, оның iшiнде мемлекеттiк кiрiстердi қысқартуды немесе мемлекеттiк шығыстарды арттыруды көздейтiн заң жобалары бойынша Үкiмет Парламентке мемлекеттiк және орыс тiлдерiнде қорытынды ұсынады.
      Парламент депутаттары бастамашылық жасаған, Үкiметке келiп түскен заңнамалық кесiмдердiң жобалары Ведомствоаралық комиссияның отырысында қаралуға тиiс. Ведомствоаралық комиссия заң жобасы Кеңседе тiркелген күнiнен бастап 15 күн мерзiмде не Премьер-Министрдiң немесе оның орынбасарының тапсырмасында белгiленген неғұрлым қысқа мерзiмде депутаттар бастамашылық жасаған заң жобасын оң не өзгеше бағалау жөнiнде ұсыныстар әзiрлейдi.
      Үкiмет қорытындысының жобасын Ведомствоаралық комиссияның ұсыныстарын ескере отырып, заң жобасында реттелетiн қатынастар құзыретiне енетiн мемлекеттiк орган әзiрлейдi. Қорытындының жобасы мемлекеттiк және орыс тiлдерiнде А4 форматындағы жай парақтарда дайындалады және келiп түскен күнiнен бастап 3 жұмыс күнiнен аспайтын мерзiмде мiндеттi түрде Әдiлет, Экономика және бюджеттiк жоспарлау министрлiктерiмен келiсiледi (олардың басшылары бұрыштама соғады). Қажет болған кезде қорытындының жобасына әзiрлеушi мемлекеттiк кiрiстердi қысқарту немесе мемлекеттiк шығыстарды арттыру бөлiгiндегi қаржы-экономикалық есептердi қоса тiркейдi. Қорытындының дайындалуына жауапты мемлекеттiк орган осы Регламенттiң 39-тармағында белгiленген тәртiппен қорытындының жобасы бойынша Үкiмет мүшелерiнiң дауыс беруiн жүргiзуге және, егер Премьер-Министрдiң немесе оның орынбасарының тапсырмасында өзге неғұрлым қысқа мерзiм белгiленбесе, Парламент депутаттары бастамашылық жасаған заң жобасы Кеңседе тiркелген күнiнен бастап 20 күн мерзiмнен кешiктiрмей Кеңсеге оның келiсiлген жобасын, оның iшiнде магниттi жеткiзгiшпен енгiзуге тиiс.
      Егер Премьер-Министрдiң немесе оның орынбасарының тапсырмасында бiрлесiп орындаушы мемлекеттiк органдар көрсетiлген жағдайда, осы органдар Парламент депутаттары бастамашылық жасаған заң жобасы Кеңседе тiркелген күнiнен бастап 10 күн мерзiмнен кешiктiрмей қорытындының дайындалуына жауапты мемлекеттiк органға өздерiнiң ұсыныстарын беруге мiндеттi.

      78. Үкiмет қорытындысының жобасына Кеңседе сараптама жүргiзiлгеннен кейiн оның түпкiлiктi нұсқасын Кеңсе Премьер-Министрдiң (оның мiндетiн атқарушы тұлғаның) қолымен Үкiмет бланкiсiне шығарып ресiмдейдi. Үкiмет қорытындысы Үкiмет қаулысымен немесе Үкiмет мәжiлiсiнiң хаттамасымен мақұлдануы да мүмкiн.

      79. Үкiмет енгiзген заң жобаларын Парламентте ұсынушы өкiлеттi тұлғаларға оларды Парламент қараған кезде заңның тұжырымдамасына немесе оның құқықтық мазмұнын өзгертуге байланысты, сондай-ақ мемлекеттiк кiрiстердi қысқартуды немесе мемлекеттiк шығыстарды арттыруды көздейтiн өзгерiстер мен толықтырулар енгiзуге Үкiмет басшылығының рұқсатынсыз келiсiм бiлдiруге тыйым салынады. Бұл ретте Парламентте тиiстi заң жобаларын ұсынушы мемлекеттiк органдардың бiрiншi басшылары Кеңсеге көрсетiлген өзгерiстер мен толықтырулар туралы дереу жазбаша хабарлауға мiндеттi.
      Парламентте тиiстi заң жобаларын ұсынушы мемлекеттiк органдардың бiрiншi басшылары Үкiметтiң келiсуiнсiз көрсетiлген өзгерiстер мен толықтыруларды енгiзуге келiскенi үшiн жауапты болады.
      Парламент депутаттары Үкiметпен келiсiлмеген көрсетiлген өзгерiстер мен толықтыруларды дауысқа салуға шығарған жағдайда заң жобаларын ұсынушы тұлғалар мәжiлiстiң стенограммасында өздерiнiң қарсылықтарын тiркеудi талап етуге және Кеңсеге осы өзгерiстер немесе толықтырулар туралы дереу хабарлауға мiндеттi. Үкiмет бастамашылық жасаған заң жобасына Парламент енгiзген тұжырымдамалық өзгерiстер мен толықтыруларды заң жобасын әзiрлеушi салыстырмалы кесте түрiнде қысқаша түйiнiмен Кеңсеге жiбередi, оларды Кеңсе Басшысы осы өзгерiстер мен толықтырулар бойынша Үкiмет бiрыңғай ұстанымды анықтау үшiн Әдiлет, Экономика және бюджеттiк жоспарлау министрлiктерiне, сондай-ақ басқа да мүдделi мемлекеттiк органдарға жiбередi.

      80. Үкiмет енгiзген заң жобаларын Парламентте ұсынушы өкiлеттi тұлғаны (заң жобасы бойынша баяндамашыны) ауыстыру қажет болған кезде Парламентке Премьер-Министрдiң не оның орынбасарының қолымен тиiстi хат жiберiледi. Бұл ретте осындай хаттардың жобаларын заң жобасын әзiрлеушi мемлекеттiк орган дайындайды және заң жобасы Парламенттiң тиiстi Палатасының жалпы отырысында қаралғанға дейiн үш жұмыс күнiнен кешiктiрмей Кеңсеге енгiзедi.

      81. Парламентте Үкiметтiң шешiм жасауын бақылауды Парламенттiң тиiстi палаталарындағы Үкiметтiң өкiлдiктерi (бұдан әрi - өкiлдiктер) жүзеге асырады.
      Өкiлдiктер Премьер-Министрдi, оның орынбасарын және Кеңсе Басшысын Үкiмет, енгiзген заң жобаларының өтуi және Парламент қарайтын әрi Үкiметтiң қызметiне қатысы бар басқа да мәселелер туралы үнемi хабардар етiп отырады.

      82. Үкiметтiң Парламенттен заң жобасын қайтарып алуы Үкiметтiң қаулысымен жүзеге асырылады, оның жобасын осы Регламентте белгiленген тәртiппен заң жобасын әзiрлеушi енгiзедi.

      83. Парламент қабылдаған және Премьер-Министрге қолын қойып бекiтуге жiберiлетiн барлық заңдар бойынша заң жобасын әзiрлеушi мемлекеттiк орган (немесе оның құзыретiне орай) Әдiлет, Экономика және бюджеттiк жоспарлау министрлiктерiмен келiсiм бойынша заң қабылданған күнiнен бастап үш күн мерзiмде қорытынды дайындайды және Кеңсеге жiбередi, онда мынадай:
      1) Үкiмет бастамашылық жасаған заң жобасын Парламентте қарау кезiнде депутаттар енгiзген өзгерiстер мен толықтырулар туралы;
      2) қабылданған заңда Қазақстан Республикасының Конституциясына, қолданыстағы заңнамалық кесiмдерге қарама-қайшылықтардың бар екендiгi туралы және оған байланысты қосымша қаржы шығыстары, экономикалық және құқықтық сандар туралы;
      3) заңды Премьер-Министрдiң қолымен бекiтудiң мүмкiндiгi туралы ақпарат айтылады.
      Осы тармақта көзделген рәсiмдердiң орындалуын бақылауды Кеңсе жүзеге асырады.

      84. Жобаны әзiрлеушi мемлекеттiк орган (немесе оның құзыретiне орай) заңнамалық кесiм күшiне енген күнiнен бастап 15 жұмыс күнiнен аспайтын мерзiмде Кеңсеге белгiленген тәртiппен келiсiлген мыналарды:
      1) мемлекеттiк органды (мемлекеттiк органдарды) қабылдануы осы заңнамалық кесiмге негiзделген нормативтiк құқықтық кесiмдердiң жобаларын әзiрлеу жөнiндегi жауапты орындаушы (жауапты орындаушылар) етiп белгiлеудi;
      2) заңнамалық кесiм күшiне енген күнiнен бастап екi айдан аспауы тиiс нормативтiк құқықтық кесiмдердi әзiрлеу мен енгiзудiң нақты мерзiмiн және өкiмнiң жобасында қамтылатын өзге де тапсырмалардың орындалуын;
      3) заңға тәуелдi кесiмдердi қабылдау және/немесе қабылданған заңнамалық кесiмге сәйкес келтiру туралы тапсырманы көздейтiн Премьер-Министр өкiмiнiң жобасын енгiзедi.

      85. Заңнамалық кесiммен реттелiп қойған қатынастар бойынша заң жобаларын әзiрлеу туралы ұсыныстар кейiннен Үкiметтiң мәжiлiсiнде қаралатын болып Ведомствоаралық комиссияның мәжiлiсiнде алдын ала қаралады.

  9. Прокурорлық ден қою актiлерiн қарау кезiнде
орталық атқарушы органдардың өзара iс-қимыл жасау тәртiбi

      86. Премьер-Министрдiң немесе оның орынбасарының тапсырмасы бойынша Үкiметтiң атына жiберiлген прокурорлық ден қою актiлерiн қарауды прокурорлық ден қою актiсiнiң мәнi болған мәселелер құзыретiне енетiн мемлекеттiк орган жүзеге асырады. Әдiлет министрлiгi тиiстi мемлекеттiк органға құқықтық және консультациялық көмек көрсетедi.

      87. Прокурорлық ден қою актiсiн қарау тапсырылған мемлекеттiк орган Қазақстан Республикасы Бас прокуратурасына (бұдан әрi - Бас прокуратура) Үкiмет жауабының жобасын және қажет болған жағдайда Үкiмет шешiмдерiнiң жобаларын дайындайды, прокурорлық ден қою актiсiнен туындайтын өзге де шараларды қабылдайды.
      Үкiметтiң Бас прокуратураға жауабының жобасын жобаны әзiрлеушi мемлекеттiк орган мiндеттi түрде Әдiлет министрлiгiмен, сондай-ақ прокурорлық ден қою актiсiн қарау туралы тапсырмада көрсетiлген өзге де мемлекеттік органдармен келiседi.
      Үкiмет жауабының жобасын келiсу оған тиiстi мемлекеттiк орган басшысының бұрыштама соғуы не ескертулер мен ұсыныстардың жоқтығы туралы хат жiберу жолымен жүзеге асырылады.

      88. Прокурорлық ден қою актiлерiне Үкiметтiң келiсiлген жауаптарының жобалары "Прокуратура туралы" Қазақстан Республикасының  Заңында  белгiленген көрсетiлген актiлерге жауап беру мерзiмi аяқталғанға дейiн 5 күннен кешiктiрмей Кеңсеге ұсынылады.

  10. Үкiметтiң кесiмдерiн жариялау тәртiбi

      89. Үкiметтiң азаматтардың құқықтарына, бостандықтары мен мiндеттерiне қатысты кесiмдерi мiндеттi түрде ресми жариялануға тиiс.

      90. Үкiметтiң мемлекеттiк құпияларды және өзге де заңмен қорғалатын құпияны құрайтын мәлiметтерi бар кесiмдерi жариялануға жатпайды.

      91. Үкiметтiң қаулылары Қазақстан Республикасының Президентi мен Қазақстан Республикасының Үкiметi кесiмдерiнiң жинағында, сондай-ақ Қазақстан Республикасының бүкiл аумағында таратылатын және заңнамада белгiленген тәртiппен Үкiметтiң қаулыларын ресми жариялауды жүзеге асыру құқығын алған мерзiмдi баспа басылымдарында жарияланады және теледидар мен радио арқылы халыққа жеткiзiлуi мүмкiн.
      Үкiметтiң Web-сайтын ақпараттық қамтамасыз ету және Үкiмет қабылдайтын шешiмдер туралы ақпаратты тарату мақсатында Internet (Интернет) жаһандық желiсiн пайдалану жекелеген ережелермен регламенттеледi.

  11. Орталық атқарушы органдардың бiрiншi басшылары iссапарларының тәртiбi

      92. Өзiнiң бастамашылығы бойынша немесе Мемлекет басшысының не Үкiмет басшылығының тапсырмасына сәйкес Қазақстан Республикасынан тысқары жерлерге, сол сияқты Қазақстанның басқа қаласына (оның iшiнде демалыс және мереке күндерi) iссапарға шығу қажет болған жағдайда орталық атқарушы органның бiрiншi басшысы күнiбұрын, iссапар басталғанға дейiн кемiнде 3 күн бұрын оның iссапарға шығуына рұқсат етуi туралы жазбаша өтiнiшпен Премьер-Министрдiң атына жүгiнуге тиiс.
      Орталық атқарушы органның бiрiншi басшысының хатында (өтiнiшiнде) iссапарға шығу қажеттiлiгiнiң негiздемесi және оның мерзiмi келтiрiлуге тиiс.
      Бiр тәулiктен аспайтын мерзiмге iссапарға шығу кезiнде жазбаша өтiнiштiң қажетi жоқ - Премьер-Министрдiң ауызша келiсiмi жеткiлiктi.

      93. Қажет болған жағдайда Премьер-Министрдiң орталық атқарушы органның бiрiншi басшысын оның жазбаша өтiнiшiнсiз-ақ қызметтiк iссапарға жiберуге құқығы бар.

      94. Іссапардан келгеннен кейiн орталық атқарушы органның бiрiншi басшысы 3 жұмыс күнiнен кешiктiрмей iссапарда болған кезең iшiнде жасалған жұмыс туралы жазбаша есеп беруге мiндеттi.
      Есептi Премьер-Министр немесе оның тапсырмасы бойынша Премьер-Министрдiң орынбасары бекiтедi.

       12. Орындалуын бақылау тәртiбi

      95. Президент, Үкiмет, Премьер-Министр кесiмдерiнiң, сондай-ақ Президенттiң, Премьер-Министрдiң, оның орынбасарының және Президент Әкiмшiлiгi мен Кеңсе басшыларының тапсырмалары бар құжаттардың орындалуын бақылауды ұйымдастыру "Қазақстан Республикасының Yкiметi туралы" Қазақстан Республикасының Конституциялық заңына, " Әкiмшiлiк рәсiмдер туралы " Қазақстан Республикасының Заңына, "Қазақстан Республикасы Президентiнiң актiлерiн дайындау, келiсу, қол қоюға ұсыну және Республика Президентiнiң актiлерi мен тапсырмаларының орындалуын бақылау тәртiбi туралы ереженi бекiту туралы" Қазақстан Республикасы Президентiнiң 1998 жылғы 2 қазандағы N 4097  Жарлығына , "Кейбiр нұсқаулықтарды бекiту туралы" Қазақстан Республикасы Үкiметiнiң 2001 жылғы 31 қаңтардағы N 168  қаулысымен  бекiтiлген Қазақстан Республикасы Премьер-Министрiнiң Кеңсесiнде, орталық және жергiлiктi атқарушы органдарда құжаттардың орындалуын бақылауды ұйымдастыру жөнiндегi нұсқаулыққа, Қазақстан Республикасының өзге де заңнамасына және осы Регламентке сәйкес жүзеге асырылады.
      Көрсетiлген құжаттардың орындалуын бақылауды олардың орындалу барысы туралы Премьер-Министрдi жүйелi түрде хабардар ететiн Кеңсе жүзеге асырады.

      96. Бақылау мынадай жолмен жүзеге асырылады:
      1) қажеттi ақпаратты талап ету;
      2) орындалуы туралы есептер мен баяндамаларды тыңдау және талқылау;
      3) тексеру және құжаттамалық тексерiстiң өзге де нысандары;
      4) жергiлiктi жерге барып тексеру;
      5) заңнамаға қайшы келмейтiн басқа да тәсiлдер.

      97. Мынадай, оның iшiнде құпия құжаттар бақылауға алынады (бұдан әрi - бақылаудағы құжаттар):
      1) Үкiметке немесе оның басшылығына тапсырмалар берiлетiн Президенттiң кесiмдерi;
      2) мемлекеттiк органдар мен ұйымдарға тапсырмалары бар Үкiметтiң қаулылары, Үкiмет мәжiлiстерiнiң хаттамалары, Премьер-Министрдiң өкiмдерi;
      3) орындалу мерзiмi көрсетiлген немесе бақылауға алу туралы нұсқаулар, "шұғыл", "баяндалсын", "ұсыныстар енгiзiлсiн" деген белгiлер бар Президенттiң Үкiметке немесе оның басшылығына, Премьер-Министрдiң, оның орынбасарының, Президент Әкiмшiлiгi басшылығының Кеңсенiң, Кеңсе Басшысының (оның мiндетiн атқарушы тұлғаның) атына тапсырмалары (оның iшiнде мәжiлiстердiң хаттамаларында және iс-шаралардың жоспарларында қамтылатындар), сондай-ақ мазмұнынан оларды бақылауға қою қажеттiлiгi туындайтын тапсырмалар. Премьер-Министрдiң, оның орынбасарларының, Кеңсе Басшысының және оның орынбасарының хаттамалық және өзге де тапсырмаларының нормативтiк-құқықтық сипаты болмайды;
      4) Парламент депутаттарының сауалдары, депутаттар бастамашылық жасаған заң жобаларына Үкiметтiң қорытындысын беру жөнiндегi өтiнiшi бар Парламент палаталарының арнау хаттары.

      98. Қазақстан Республикасы қатысушысы болып табылатын халықаралық шарттардың орындалуын бақылауды Сыртқы iстер министрлiгi жүзеге асырады.

      99. Бақылаудағы құжаттардың уақтылы және сапалы орындалуы үшiн жауапкершiлiк олар орындалуға жiберiлген мемлекеттiк органдардың бiрiншi басшыларына жүктеледi.

      100. Президент кесiмдерiнiң орындалуына жауапты мемлекеттiк органдар үш күн мерзiмде оларды iске асыру жөнiндегi ұйымдастыру iс-шараларының жоспарын жасайды.

      101. Үкiмет пен Премьер-Министр кесiмдерiнiң орындалу мерзiмiн Премьер-Министр не нақты кесiмнiң орындалуын бақылау жүктелген оның орынбасары және Премьер-Министрдiң келiсiмi бойынша Кеңсе Басшысы мемлекеттiк орган басшысының белгiленген тәртiппен енгiзiлген жазбаша өтiнiшi негiзiнде ұзартуы мүмкiн. Орындалу мерзiмiн ұзартуға екi реттен артық жол берiлмейдi.
      Үкiмет пен Премьер-Министрдiң кесiмдерiн және тапсырмаларын бiрлесiп орындаушы мемлекеттiк органдар, егер тиiстi тапсырмада өзгеше белгiленбесе, оған белгiленген орындалу мерзiмi аяқталғанға дейiн 3 күннен кешiктiрмей, ал орындалу мерзiмi 5 күннен аз тапсырмалар бойынша тапсырма келiп түскен күнiнен бастап бiр жұмыс күнi iшiнде ұсыныстарды жинақтауды жүзеге асыратын мемлекеттiк органға өз ұсыныстарын енгiзуге мiндеттi.

      102. Бақылаудағы құжатты оған қол қойған немесе орындалуын бақылауды талап ететiн тапсырма берген лауазымды тұлға не оның мiндетiн атқарушы тұлға не оның тапсырмасы бойынша өзге тұлға бақылаудан алады.
      Үкiметке және/немесе Кеңсеге тапсырмалары бар Президент кесiмдерiн бақылаудан алу және олардың орындалу мерзiмiн ұзарту мәселелерiн Президент Әкiмшiлiгi қарайды.

      103. Президенттiң жеке тапсырмаларын барлық мемлекеттiк органдар мен лауазымды тұлғалар, егер Президент өзгеше белгiлемесе, тапсырма берiлген күнiнен бастап екi аптадан аспайтын мерзiмде орындауы тиiс.

      104. Президенттiң және Президент Әкiмшiлiгi басшылығының бақылаудағы тапсырмаларын оларға Премьер-Министрдiң, оның орынбасарының және Кеңсе Басшысының қарарларымен бiрге орталық және жергiлiктi атқарушы органдар, егер тапсырмаларда өзге мерзiм белгiленбесе, Президент және/немесе Президент Әкiмшiлiгiнiң басшылығы тапсырған күнiнен бастап 25 күн мерзiмнен кешiктiрмей орындайды.

      105. Үкiмет мәжiлiстерiнiң хаттамаларында және Президентте, Үкiмет басшылығында және Кеңсе Басшысында өткен кеңестердiң хаттамаларында қамтылатын хаттамалық тапсырмалардың орындалу мерзiмi мәжiлiс (кеңес) өткен күнiнен бастап есептеледi. Егер мәжiлiсте (кеңесте) нақты тапсырманың орындалу мерзiмi аталған жағдайда, атына тапсырма берiлген және өкiлдерi мәжiлiске (кеңеске) қатысқан тиiстi мемлекеттiк органдар мәжiлiстен (кеңестен) кейiн бiрден, оларға мәжiлiс (кеңес) хаттамасының түсуiн күтпестен, тапсырмаларды орындауға кiрiсуге мiндеттi. Премьер-Министрдiң, оның орынбасарының және Кеңсе Басшысының тапсырмалары, егер тапсырмаларда өзге мерзiм белгiленбесе, тапсырма берiлген күнiнен бастап бiр ай мерзiмнен кешiктiрмей, ал "шұғыл" немесе "жеделдетiңiз" деген белгi болған кезде 10 күн мерзiмде орындалады.
      Премьер-Министрдiң немесе оның орынбасарының Парламент депутаттарының сауалдарына жауаптар және Парламент депутаттары бастамашылық жасаған заң жобаларына қорытындылардың жобаларын дайындау туралы тапсырмалары, егер тапсырмаларда өзге неғұрлым қысқа мерзiм белгiленбесе, тиiсiнше сауал Кеңседе тiркелген күнiнен бастап 25 күн және заң жобасы тiркелген күнiнен бастап 20 күн мерзiмнен кешiктiрмей орындалады.
      Егер Yкiметтiң, Премьер-Министрдiң, оның орынбасарының және Кеңсе Басшысының хаттамалық тапсырмаларында және Yкiмет пен Премьер-Министрдiң кесiмдерiнде, сондай-ақ iс-шаралар жоспарларында нақты орындалу мерзiмi көрсетiлмеген және олардың мазмұнынан олардың орындалуы ұзақ уақытты (тұрақты, бiр жыл iшiнде және т.с.с.) талап ететiнi туындаған не олардың мазмұнынан орындалу мерзiмi туралы бiр мәндi қорытынды жасау қиын болған жағдайда, сондай-ақ даулы жағдайларда, осындай тапсырмаларды бақылауға алу қажеттігін, оларды орындаудың нақты мерзiмiн белгiлеудi Кеңсе айқындайды және орындалуына жауапты мемлекеттiк органдарға дереу жеткiзедi.
      Егер тапсырманың белгiленген мерзiмде орындалуы мүмкiн болмаса, онда тапсырманың орындалуына жауапты мемлекеттiк органның басшысы кешiктiрiлуiнiң себептерi туралы хабарлауға және белгiленген тәртiппен оның орындалу мерзiмiн ұзарту туралы өтiнiш жасауға тиiс. Тапсырманың орындалу мерзiмiн ұзартуға екi реттен артық жол берiлмейдi. Белгiленген орындалу мерзiмiн ауыстыру туралы ұсыныстар екi реттен артық енгiзiлген кезде мемлекеттiк органдардың басшылары бiр уақытта жазалау туралы бұйрықтың көшiрмесiн қоса бере отырып, орындаудың ұзартылған мерзiмiн бұзуға жол берген лауазымды тұлғаларға қолданылған тәртiптiк жауапкершiлiк шаралары туралы ақпарат ұсынуға тиiс.
      Бақылаудағы құжаттарды орындаудың белгiленген мерзiмiн бұзу және оларды сапасыз орындау тәртiптiк терiс қылық болып табылады. Бақылаудағы құжаттарды орындаудың мерзiмiн бұзу және/немесе сапасыз орындау фактiлерi бойынша орындалуына жауапты мемлекеттiк органдардың бiрiншi басшыларының бұйрықтарымен "Қазақстан Республикасының мемлекеттiк әкiмшiлiк қызметшiлерiне тәртiптiк жаза қолдану ережесiн бекiту туралы" Қазақстан Республикасы Президентiнiң 1999 жылғы 31 желтоқсандағы N 321  Жарлығымен белгiленген тәртiппен кiнәлi лауазымды тұлғалар тәртiптiк жауапкершiлiкке тартылады.

      106. Бақылаудағы, оның iшiнде құпия құжаттардың орындалуына жауапты мемлекеттiк органдар Кеңсеге:
      1) Үкiмет пен Премьер-Министрдiң кесiмдерiнде өзгеше белгiленбесе, бақылаудағы құжаттарды орындаудың белгiленген мерзiмi аяқталғаннан кейiн әрбiр бақылаудағы құжаттың не оның нақты тармақтарының орындалуы туралы есептi;
      2) есептi тоқсаннан кейiнгi айдың 5-күнiне атқарушылық тәртiптiң жай-күйi және жазалау туралы бұйрықтың көшiрмесiн қоса бере отырып, бақылаудағы құжаттарды орындау мерзiмiнiң бұзылуына немесе олардың сапасыз орындалуына кiнәлi нақты лауазымды тұлғаларды жауапкершiлiкке тарту жөнiнде қабылданған шаралар туралы ақпаратты ұсынады.

      107. Мыналарды бақылаудан алу не орындалу мерзiмiн өзгерту туралы шешiм қабылдау:
      1) Президенттiң тапсырмалары, оның iшiнде Президенттiң кесiмдерiнде, оның қатысуымен өткен кеңестердiң (мәжiлiстердiң) хаттамаларында және Президент немесе Президент Әкiмшiлiгінiң Басшысы бекiткен iс-шаралар жоспарларында қамтылатын тапсырмалар тиiсiнше Президенттiң немесе Президент Әкiмшiлiгi Басшысының не оның мiндетiн атқарушы тұлғаның қарары бойынша;
      2) Президент Әкiмшiлiгi басшылығының тапсырмалары, оның iшiнде Президент Әкiмшiлiгiнiң басшылығында өткен кеңестердiң хаттамаларында және ол бекiткен iс-шаралар жоспарларында қамтылатын тапсырмалар Әкiмшiлiк Басшысының немесе тапсырма берген тұлғаның қарары бойынша;
      3) тапсырмалар, оның iшiнде Үкiмет пен Премьер-Министрдiң кесiмдерiнде, Үкiмет мәжiлiстерiнiң және Премьер-Министрде өткен кеңестердiң хаттамаларында қамтылатын тапсырмалар Премьер-Министрдiң немесе оның келiсiмi бойынша Кеңсе Басшысының не оның мiндетiн атқарушы тұлғаның қарары бойынша;
      4) Премьер-Министр орынбасарының тапсырмалары, оның iшiнде ол өткiзген кеңестердiң хаттамаларында және ол бекiткен iс-шаралар жоспарларында қамтылатын тапсырмалар Премьер-Министр орынбасарының қарары бойынша;
      5) Кеңсе Басшысының тапсырмалары, оның iшiнде Кеңсе Басшысында өткен кеңестердiң хаттамаларында және ол бекiткен iс-шаралар жоспарларында қамтылатын тапсырмалар Кеңсе Басшысының не оның мiндетiн атқарушы тұлғаның қарары бойынша жүзеге асырылады.

      108. Бақылаудағы, оның iшiнде құпия сипаттағы тапсырмалардың орындалуына жауапты мемлекеттiк органдар Кеңсеге жiберетiн олардың орындалуы туралы есептерде белгіленген орындалу мерзіміне сәйкес міндетті түрде мыналар қамтылуы тиiс:
      1) егер объективтi себептермен тапсырманың белгiленген мерзiмде орындалуы мүмкiн болмаса, жаңа нақты мерзiмiн көрсете отырып не орындау мерзiмiн ұзарту туралы өтiнiш;
      2) егер тапсырма толық көлемде орындалған болса, не бақылаудан алу туралы өтiнiш;
      3) егер тиiстi кесiммен немесе тапсырмамен мерзiмдi ақпарат ұсыну көзделген болса, не құжаттың ақпарат беру тәртiбiмен енгiзiлiп отырғаны туралы жазба.

      109. Іс-шаралар жоспарлары мен Премьер-Министр, оның орынбасары мен Кеңсе Басшысы тапсырмаларының, оның iшiнде Үкiмет қаулыларының және Премьер-Министр өкiмдерiнiң жобаларын енгiзудi көздейтiн хаттамалық тапсырмаларының нақты тармақтарын бақылаудан алу үшiн тиiстi қаулы немесе өкiм қабылдау негiз болып табылады.

      110. Премьер-Министрдiң орынбасары мен Кеңсе Басшысы осы Регламенттiң талаптарын, оның iшiнде бақылаудағы құжаттарды орындау тәртiбiн өрескел бұзу фактiлерi бойынша Премьер-Министрге кiнәлi лауазымды тұлғаларды тәртiптiк жауапкершiлiкке тарту жөнiнде ұсыныстар енгiзе алады.

      111. Премьер-Министрдiң орынбасары, Кеңсе Басшысы және оның орынбасарлары осы Регламент талаптарының қатаң сақталуын қамтамасыз етедi.

                                           Қазақстан Республикасы
                                          Үкiметiнiң Регламентiне
                                                 1-қосымша

      ______________________________________________________
                          жобаның атауы

       Қазақстан Республикасының Үкiметi қаулысының жобасына
                         ТҮСIНДIРМЕ ЖАЗБА

Р/с
N

Түсiндiрме жазбада көрсетiлуге тиiс
мәлiметтердiң тiзбесi

Әзiрлеушi
мемлекеттiк
органның ақпараты

1.

Жобаны әзiрлеушi мемлекеттiк орган

  

2.

Жобаны қабылдау қажеттiгiнiң негiздемесi

  

3.

Жоба қабылданған жағдайда болжанатын әлеуметтiк-экономикалық және/немесе құқықтық салдарлар

  

4.

Жобаны iске асыруға байланысты болжанатын қаржылық шығындар

  

5.

Жобаны, қабылдаудың нақты мақсаттары, күтiлетiн нәтижелердiң мерзiмi және болжанатын тиiмдiлiгi

  

6.

Жобада қаралатын мәселелер бойынша Президенттiң және/немесе Үкiметтiң бұрын қабылданған кесiмдерi және олардың iске асырылу нәтижелерi туралы мәлiметтер

  

7.

3аңнаманы кейiннен жобаға сәйкес келтiру қажеттiгi

  

8.

Премьер-Министрдiң тапсырмасы бойынша басқа ұйымдарда қосымша сараптама (құқықтық, экономикалық, экологиялық, қаржылық және басқа да) жүргiзiлген жағдайда оның нәтижелерi

  

9.

Өзге де мәлiметтер

  

      Мемлекеттiк органның
      бiрiншi басшысы           _________/________________________
                                  қолы     қолдың толық жазылуы

      _____________
          күні

                                           Қазақстан Республикасы
                                          Үкiметiнiң Регламентiне
                                                 2-қосымша

   Қазақстан Республикасының Үкiметi қаулысының жобасы бойынша
           Yкiмет мүшелерiнiң дауыс беру нәтижелерiн
                        ЕСЕПКЕ АЛУ ПАРАҒЫ

    1. ______________________________________________________
                          жобаның атауы

    2. Дауыс беру нәтижелері:      

Р/с
N

Үкiмет мүшесiнiң лауазымы

Дауыс бердi:*

Дауыс берген
жоқ

1.

  

ия

жоқ

 

2.

  

  

  

  

...

  

  

  

  

17.

  

  

  

  

  

Дауыс берген Үкiметi мүшелерінің барлығы

  

  

  

      Мемлекеттiк органның
      бiрiншi басшысы           _________/________________________
                                  қолы     қолдың толық жазылуы

      _____________
          күні

________________________
* Тиісті сандар қойылатын "Дауыс берген Үкiмет мүшелерiнің барлығы"
деген жолды қоспағанда, 2-тармақтың "Дауыс берді" және "Дауыс
берген жоқ" деген бағандарында тиiсiнше "+" немесе "-" белгілері
қойылады.

                                          Қазақстан Республикасы
                                          Үкiметiнiң Регламентiне
                                                 3-қосымша

                                         Қазақстан Республикасының
                                             Премьер-Министрi
                                         __________________________
                                                  Аты-жөнi

       Қазақстан Республикасы Премьер-Министрiнiң Кеңсесiндегi
                  сараптама нәтижелерi бойынша
       ___________________________________________________________
                           жобаның атауы

       Қазақстан Республикасының Үкiметi қаулысының жобасына
                         ҚОРЫТЫНДЫ

      Қазақстан Республикасы Премьер-Министрiнiң Кеңсесi (бұдан әрi
- Кеңсе) ___________________________________________________________
                    резидент немесе Үкiмет кесiмiнiң атауы,
____________________________________________________________________
     тармағының нөмiрi, оның қабылданған күнi не тапсырманы кiм
________________________________________ сәйкес немесе бастамашылық бергені, оның нөмірi мен күнi көрсетiледi
жасау тәртiбiмен ___________________________________________________
                 жобаны әзiрлеуші мемлекеттік органның атауы
енгiзген ___________________________________________________________
                             жобаның атауы
қаулының жобасын қарап, мынаны хабарлайды.
      Осы қаулы жобасын (бұдан әрi - жоба) қабылдау қажеттiгi
_____________________________ негiзделген.
негiздемесi көрсетiледi

      Жобаны дайындау кезiнде Үкiмет Регламентiнiң талаптары сақталған (сақталмаған) (егер қандай да бiр бұзушылықтар бар болса, онда олар Регламенттiң нақты тармақтарына сiлтеме көрсетiле отырып жазылады).
      Жобаны қабылдау үшiн_____, қарсы _____Үкiмет мүшесi дауыс бердi, ____ Үкiмет мүшесi дауыс берген жоқ.
      Жоба қабылданған жағдайда болжанатын әлеуметтiк-экономикалық
және/немесе құқықтық салдар________________________________________.
                                  ықтимал салдарлар көрсетіледi

      Жобаны iске асыруға байланысты болжанатын қаржылық шығындар
республикалық бюджетте көзделген (көзделмеген) _______ теңге бюджет
қаражатын талап етедi және/немесе республикалық бюджеттен
және/немесе басқа қаржыландыру көздерiнен қосымша қаржы бөлудi
талап етедi (талап етпейдi).
      Жобаны Кеңсенiң құрылымдық бөлiмшелерiнде сараптау нәтижелерi
бойынша мазмұндық және құқықтық сипаттағы, оның iшiнде заңдық
техника бойынша ескертулер (ескертулер егжей-тегжейлi жазылады)
болды (болған жоқ), оларды (мұндай факт болған кезде) әзiрлеушi
жобаны пысықтау кезiнде жойды (жойған жоқ).
      Бұдан басқа,__________________________________________________
                      қажет болған кезде басқа қосымша мәлiметтер
                                   келтiрiледi
      Жобаны қабылдау_______________________________________________
____________________________________________________________________
жобаны қабылдаудан күтілетін нәтижелер және болжанатын тиiмдiлiгі
 
______________ мүмкiндiк бередi.
көрсетiледi
 
      Баяндалғанға байланысты жобаны қабылдауға (керi қайтаруға не
оны пысықтауға немесе қосымша келiсуге жiберуге) болады деп
пайымдаймыз.

      Премьер-Министр
      Кеңсесiнiң Басшысы       _________/________________________
                                  қолы     қолдың толық жазылуы

      _____________
          күні

Көмек
Көмек
Ай бойы келгендердің барлығы:
Кеше келгендердің барлығы:
Қазір порталда:
URL:
Қате:
Пікір:

Спасибо, информация об ошибке принята.

Извините, в данный момент информация об ошибке не может быть обработана.
Попробуйте позже.